Stórt snjóflóð féll á Siglufjarðarveg í nótt. Veginum hefur verið lokað. Ofanflóðasérfræðingur Veðurstofunnar segir flóðið eitt það stærsta sem fallið hefur á svæðinu. Flóðið féll úr Selskál skammt utan við Siglufjörð, fór yfir veginn og út í sjó. Mikil úrkoma hefur verið á Tröllaskaga undanfarna daga. Veðurstofan segir á vef sínum að uppsöfnuð úrkoma á Siglufirði og Ólafsfirði sé um og yfir 100 millimetrar. Vegna þessa hefur Veðurstofan lýst yfir óvissustigi vegna snjóflóðahættu. Fréttin verður uppfærð.