Ólafur Adolfsson, þingmaður Sjálfstæðisflokksins, hefur óskað eftir fundi með Eyjólfi Ármannssyni innviðaráðherra og þingmönnum Norðvesturkjördæmis til að ræða afnám línuílvilnun og skel- og rækjubætur. Frumvarp innviðaráðherra um breytingar á lögum um stjórn fiskveiða var lagt fram á Alþingi á mánudag. Í frumvarpinu er meðal annars lagt til að afnema línuívilnun og skel- og rækjubætur. Tilurð skelbótanna má rekja til upphafs fiskveiðistjórnunarkerfisins eins og það er í dag. Bæturnar voru innleiddar sem tímabundin ráðstöfun og oft hefur staðið til að fella þær niður. Málið er þó flóknara en svo að það sé hægt að gera með einu pennastriki og innviðaráðherra, sem fer með byggðamál, endurskoðar úthlutanir innan þessa kerfis. Hvað eru skelbætur? Skel- og rækjubætur eru veiðiheimildir sem úthlutað er til þeirra sem áttu kvóta í skel og rækju áður en hrun varð í þeim veiðum. Þær falla undir byggðakerfi fiskveiðistjórnunarkerfisins, þar sem 5,3% af árlegum veiðiheimildum eru teknar frá úthlutunum til kvótaeigenda til að efla atvinnu og byggð í landinu eins og það er orðað í lögum og reglugerðum. Undir 5,3-pottinum eru hinar ýmsu ráðstafanir í fiskveiðikerfinu: strandveiðar, byggðakvóti almennur og sértækur, línuívilnun og svo skel- og rækjubætur. Hvað er línuívilnun? Bátar sem veiða á línu mega koma með 20% meiri afla í land en kvótinn þeirra segir til um, meðan heimildir til línuívilnunar endast. Þetta er eingöngu fyrir báta sem fara í dagróðra og láta beita í landi. Markmiðið með þessu er að vernda störf við beitningu í landi. Breytingarnar sem innviðaráðherra leggur til miða meðal annars að því að fjölga strandveiðidögum. „Afnám skelbóta í Stykkishólmi mun bæta við hálfum degi á strandveiðum og setur fjölda heilsársstarfa í fullkomið uppnám,“ segir Ólafur í færslu sem hann birtir á Facebook. Ólafur, sem er fyrsti þingmaður Norðvesturkjördæmis, hefur óskað eftir fundi með ráðherra og þingmönnum kjördæmisins þar sem hann hyggst óska eftir skýringum frá ráðherra. „Er mönnum ekkert heilagt í aðför að sjávarbyggðum?“ spyr Ólafur. Útgerðarmenn í sjávarplássum hafa áður varað við breytingunum og segja sviptingar í byggðakerfi sjávarútvegs geta haft alvarlegar afleiðingar. Helmingsminnkun í línuívilnun og skelbótum gæti leitt til minni umsvifa, lægri tekna og verri afkomu.