Kostirnir við þessar veiðar eru þeir helstir að hægt er að nota mun stærri troll en hvort skip um sig gæti dregið, ekki þarf að nota toghlera og olíueyðsla verður mun minni en ella. Að auki væntir Sigurður Kristjánsson, skipstjóri á Blika EA, þess að netakostnaður verði mun minni þegar áhafnir skipanna hafa öðlast meiri reynslu á þessum veiðiskap. Meira en helmingi stærri troll en á venjulegum togveiðum Fiskifréttir 13. ágúst 1993. „Við erum núna að byrja í þriðja túr á þessum „tvílembingsveiðum“ og auðvitað erum við ekki komnir með mjög mikla reynslu enn sem komið er. Það virðist þó ljóst að ufsa- og grálúðuveiðarnar koma mjög vel út hjá okkur en okkur hefur ekki gengið nógu vel á karfanum. Við höfum reyndar aðeins reynt karfaveiðar í Rósagarðinum enn sem komið er en þar hefur mikið rifnað hjá okkur. Við erum að fikra okkur áfram og það er búið að styrkja trollin og vonandi dregur úr netavinnunni þegar fram líða stundir. Við erum með meira en helmingi stærri troll en á venjulegum togveiðum og það getur verið mjög snúið að gera við trollið ef það rifnar mikið. Við höfum mest lent í sólarhrings langri netavinnu úti á sjó vegna rifrildis og það er auðvitað of mikið af því góða,“ segir Sigurður. Færeyingar hafi lengi stundað „tvílembingsveiðar“ Sigurður upplýsti að lítil reynsla sé komin á þorskveiðar með einu stóru trolli, sem dregið er af tveimur skipum, og þeir hafi enn ekki reynt ýsuveiðar. „Tvílembingsveiðar“ eru vel þekktar í nágrannalöndunum og Færeyingar hafa lengi stundað þennan veiðiskap. Fyrstu trollin sem Bliki EA og Oddeyri EA notuðu, voru fengin frá Færeyjum en Bliki EA er nú kominn með nýtt troll sem sett var upp á Dalvík. Á hefðbundnum togveiðum eru notaðir toghlerar til þess að halda trollinu opnu í sjónum á meðan togað er en þegar tvö skip toga samtímis þarf enga hlera. Leitast við að jafna aflann Sigurður segir að skipin sjái um að trollopnunin verði sem best og aðeins þurfi lóð til þess að sökkva trollinu. Þess má geta að upplýsingar frá trollinu berast í stjórntölvu í brú beggja skipa og skiptir þá ekki máli frá hvoru skipi trollið er. „Það er forsenda þessa veiðiskapar að skipin séu svipuð. Þau þurfa að vera af svipaðri stærð, með svipað vélarafl, vinnslugetan þarf að vera svipuð og eins lestarrýmið. Við leitumst við að jafna aflann eftir föngum og ef annað skipið fær mjög stór hol þá tekur hitt bara tvö eða þrjú hol í röð. Það getur auðvitað skeikað einhverju á aflanum í hverjum túr en á lengri tíma ætti þetta að jafnast út,“ segir Sigurður. Þrjátíu prósent olíusparnaður Þess má geta að aflaverðmætið hefur verið um 22 til 24 milljónir hjá hvoru skipi í túr að undanförnu en hver túr stendur yfirleitt í 20 til 25 daga. Aflaverðmætið er því nálægt 1 milljón króna á úthaldsdag og Sigurður segir menn mjög sátta við þann árangur. „Það er alveg ljóst að aflinn hjá okkur var mun minni framan af árinu en á sama tíma í fyrra. Við erum að gera okkur vonir um að með þessum „tvílembingsveiðum“ þá takist okkur að halda í horfinu og það er að minnsta kosti ljóst að við ættum að geta náð kostnaði mjög verulega niður. Mér sýnist t.d. blasa við að olíueyðslan hjá okkur á þessun veiðum sé að minnta kosti 30 prósent minni en ef við værum á hefðbundnum togveiðum,“ segir Sigurður. Ná árangri á mun meira dýpi Sigurður segir að einn kosturinn við „tvílembingsveiðarnar“ sé sá að hægt sé að ná árangri á mun meira dýpi en ef skipin væru ein sér á veiðum. „Þetta á vafalaust eftir að skila árangri á til dæmis grálúðuveiðunum. Grálúðan hefur verið að dýpka verulega á sér út af Víkurálnum og þar ná aðeins stærstu og öflugustu skipin árangri nú. Við fengum góða veiðiút af Víkuránum fyrir nokkrum árum en eftir því sem grálúðan dýpkaði á sér þá dróst aflinn saman. Við höfum því einbeitt okkur að svæðinu fyrir austan, út af Héraðsflóa og Seyðisfirði, en grálúðan hefur veiðst þar á 250 til 400 faðma dýpi. Við höfum verið þar með Oddeyrinni og náð góðum árangri. Einn kosturinn við það svæði er einnig sá að þar er sléttur og góður botn og því minni hætta á að trollið rifni,“ segir Sigurður. Mjög ánægður með gang mála Að sögn Sigurðar er hann mjög ánægður með gang mála á ufsa- og grálúðuveiðunum. Allur ufsinn var flakaður um borð og unninn á Bandaríkjamarkað nema þegar aflinn var hvað mestur. Þá varð að vinna hann á Evrópumarkað. Gott samstarf við Oddeyrarmenn „Auðvitað eigum við eftir að öðlast meiri reynslu og þekkingu á þessum veiðiskap og enn sem komið er höfum við ekki lent í verulega vondum veðrum. Það hefur brætt hressilega á okkur tvisvar til þrisvar en það reynir ekki verulega á þessa veiðitækni fyrr en eftir að við höfum reynt íslenskt vetrarveður á miðunum. Ég kvíði þó engu. Samstarfið við Oddeyrarmenn hefur verið til mikillar fyrirmyndar. Það verður einnig gaman að fylgjast með árangri Hjalteyrarinnar EA og Nóa EA á þessum veiðiskap. Nói EA er þar í hlutverki dráttarbáts en aflinn er allur unninn um borð í Hjalteyrinni. Við erum að fikra okkur áfram á þessu sviði og vafalaust á þessum veiðiskap eftir að vaxa fiskur um hrygg á komandi árum,“ segir Sigurður Kristjánsson að lokum.