Bandaríkjaher hóf á mánudag að hindra för skipa til og frá Íran um Hormússund. Með því ætla bandarísk stjórnvöld að setja þrýsting á hagkerfi Írana sem er háð útflutningi á olíu og gasi. Bjarni Már Magnússon hafréttarsérfræðingur segir þetta öfugsnúna þróun. „Bandaríkjamenn hafa ævinlega verið miklir talsmenn siglingafrelsis út frá viðskiptahagsmunum og hafa verið að grípa til ýmissa aðgerða sem eru ekki í samræmi við þetta regluverk hafsins sem þeir hafa barist við að koma á og haldið uppi með hörku þannig að þetta er allt mjög öfugsnúið.“ Bjarni Már Magnússon, hafréttarsérfræðingur, segir öfugsnúið að Bandaríkjamenn, sem hafi í gegnum tíðina verið miklir talsmenn siglingafrelsis í þágu viðskipta, grípi nú til aðgerða á Hormússundi til að hindra ferðir skipa. Ákveðnar reglur gilda um sund eins og Hormússund. Bjarni Már segir að vandamálið sé að hvorki Íran, Bandaríkin né Ísrael séu aðilar að hafréttarsamningi Sameinuðu þjóðanna. Því eigi venjuréttur að gilda og að um hann deili ríkin. Annað regluverk gildi um herkví eða hafnbann. „Þá gildir annað regluverk, regluverk um stríðsátök, og það er í raun og veru það sem er þarna og þetta er svona klassískt regluverk sem er af og til gripið til í hernaðarátökum.“ Þá segir Bjarni Már það eiga að vera lykilskilyrði þegar herkví sé sett á að henni sé framfylgt og að ekki eigi að mismuna skipum, bannið eigi að gilda gagnvart öllum. „Samkvæmt fréttum hafa skip verið að fara í gegn, þá virðist vera að það sé ekki verið að framfylgja banninu almennilega, sem einhver myndi segja að væri þá ólöglegt.“