Guðmundur Kristjánsson, forstjóri Brims, telur ranga mynd dregna upp í umfjöllun danska dagblaðsins Berlingske tidende um íslenskan sjávarútveg. Hann segir allt uppi á borðum í íslenskum sjávarútvegi sem fylgi lögum í landinu. Umfjöllunin kom út fyrir nokkrum dögum og er byggð á samtölum blaðamannsins Emil Eire Frerk Olsen við 19 heimildarmenn. Í greininni er sagt að sjávarútvegurinn sé að „éta upp lýðræði landsins að innan“, atvinnugreininni lýst sem „nútíma fámennisstjórn“ og hún er sögð byggð á ótta, græðgi og pólitískum áhrifum. Gert lítið úr íslensku stjórnkerfi Guðmundur segir sér ekki finnast vinnubrögð blaðamannsins og miðilsins vönduð. „Mér finnst hann gera lítið úr okkar stjórnkerfi. Hann segir að hér sé spilling og að við fylgjum ekki íslenskum lögum.“ Sjávarútvegurinn hafi fylgt lögum um kvótakerfið síðastliðin 40 ár. „Alþingismenn hafa samþykkt þessi lög og við höfum alltaf farið eftir þessu. Ísland er nú talið eitt minnst spillta land í heimi, hvað sem allir segja.“ Ísland situr í tíunda til ellefta sæti á lista Transparency International yfir mat fólks á gagnsæi og spillingu innan ríkja, neðst allra Norðurlanda. Danmörk trónir hins vegar á toppi listans. Spurður hvort hann telji sjávarútveginn hafa óhófleg pólitísk ítök, líkt og haldið er fram í danska miðlinum, segist Guðmundur ekki hafa orðið var við annað en að stjórnmálamenn hafi verið með sínar sjálfstæðu skoðanir. „Ég hef ekki orðið var við það að þeir væru að hugsa um einhvern lítinn þröngan hóp. Lögin eru sett til að búa til verðmæti fyrir allt landið.“ Harmar orð ráðherra Í umfjöllun Berlingske var rætt við Daða Má Kristófersson, fjármála- og efnahagsráðherra. Haft er eftir honum að hann hafi lengi reynt að „leysa vandann“ en að „öflugir þrýstihópar“ standi í vegi. Guðmundi finnst ráðherra vera að gefa í skyn að framkvæmdavaldið ráði ekki við að fylgja lögum sem Alþingi hafi samþykkt. „Ég segi það fullum fetum að við förum eftir íslenskum lögum. Mér finnst það miður að hann skuli tjá sig svona um íslenskt samfélag í erlendu blaði.“