Bandaríkjaher ætlar að senda 200 hermenn til Nígeríu á næstu vikum til að þjálfa nígeríska hermenn til að berjast gegn vígasveitum íslamista. Nígería hefur verið undir þrýstingi frá Bandaríkjastjórn vegna óstöðugleika í landinu og óskaði nígeríska ríkisstjórnin eftir aðstoð frá Bandaríkjaher til að þjálfa herinn. Bandarísku hermennirnir munu ekki berjast gegn vígasveitum hryðjuverkamanna, heldur miðla upplýsingum sem nýtast nígeríska hernum í árásum og aðgerðum þeirra gegn hryðjuverkamönnum. Donald Trump Bandaríkjaforseti hefur sagt kristna íbúa landsins vera ofsótta í Nígeríu. Stjórnvöld í Nígeríu hafa hafnað því að hryðjuverkaógnin í landinu beinist sérstaklega gegn kristnu fólki og benda á að múslimar og fólk af öðrum trúarhópum verði líka reglulega fyrir árásum í landinu.