Þrjú börn, tveir eins árs drengir og tveggja ára stúlka, og karlmaður létu lífið í árásum Rússa á borgina Bohodukhiv í Kharkiv-héraði í Úkraínu í gær. Þá slasaðist einnig kona á áttræðisaldri í árásunum og barnshafandi kona á fertugsaldri. Rússneskar hersveitir hafa aukið árásir sínar í Kharkiv-héraði undanfarið, sér í lagi á samgöngu- og orkuinnviði. Samkvæmt eftirlitsnefnd Sameinuðu þjóðanna um mannréttindi í Úkraínu hafa 15.000 almennir borgarar verið drepnir í Úkraínu síðan innrás Rússa hófst fyrir hartnær fjórum árum. Á síðasta ári var mesta mannfall á einu ári síðan innrásin hófst, þegar yfir 2.500 manns létu lífið.