Skulda­bréfa­markaðurinn virðist enn verð­leggja vaxta­hækkun Seðla­banka Ís­lands, þrátt fyrir að nýjustu verðbólgutölur hafi reynst lægri en margir höfðu gert ráð fyrir. Ávöxtunar­krafa RIKB 26, sem er á gjald­daga í október, stóð í 8,05% á miðju verðbili í dag. Ávöxtunar­krafa RIKB 27, sem er á gjald­daga í apríl 2027, stóð í 8,00% á miðju verðbili. Krafa styttri óverð­tryggðra ríkis­bréfa hefur þar með færst í kringum 8%, sem bendir til þess að fjár­festar geri ráð fyrir háu vaxta­stigi á næstu misserum. Verðlagningin bendir einnig til þess að markaðurinn telji enn líkur á að peninga­stefnu­nefnd Seðla­bankans hækki vexti á næsta vaxtaákvörðunar­fundi eða haldi að minnsta kosti mjög aðhalds­samri stefnu áfram. Staðan er þó ekki ein­hlít. Þótt stutti endir skulda­bréfa­markaðarins endur­spegli væntingar um hærri eða áfram háa vexti eru ýmis merki um að efna­hags­um­svif séu að hægja á sér. Meiri líkur en minni á hækkun Gunnar Örn Er­lings­son, for­stöðumaður skulda­bréfa­miðlunar Arion banka, segir að fyrir verðbólgutölur dagsins hafi hann ekki verið sann­færður um að vaxta­hækkun í maí væri sjálf­gefin niður­staða. Verðbólgutölurnar í morgun voru í lægri kantinum miðað við spár og væntingar, en verðlagning á skulda­bréfa­markaði er hins vegar á þá leið að meiri líkur en minni séu á að Seðla­bankinn hækki vexti. Hann bendir þó á að ákvörðunin sé ekki ein­föld, enda hafa ýmsir hag­vísar bent til hægari efna­hags­um­svifa. Í síðustu yfir­lýsingu peninga­stefnu­nefndar hafi nefndin sjálf tekið fram að „flestir hag­vísar bera nú vitni um hægari efna­hags­um­svif“. Gunnar bendir á að fleiri hag­vísar styðji þá mynd að það sé farið að hægja á hag­kerfinu. Korta­veltutölur hafi verið veikari tvo mánuði í röð og um­svif á fast­eigna­markaði hafi einnig dregist saman. Þá sé staðan orðin al­var­leg á bygginga­markaði. Væntinga­vísi­tala Gallup og leiðandi hag­vísir Analyti­ca bendi sömu­leiðis til aukinnar svartsýni. Þetta eru þættir sem að hans mati gætu stutt þau rök að Seðla­bankinn bíði átekta, jafn­vel þótt verðbólga sé enn yfir mark­miði, því út­lit er fyrir að ár­staktur verðbólgunnar hafi náð há­marki í 5,4%, sé nú 5,2% eftir töluna í morgun og gæti orðið um 4,5-4,7% í sumar. „Því mætti spyrja sig hvort þörf væri á harðara aðhaldi hafi toppnum verið náð. Ég er ekki svo viss um að peninga­stefnu­nefnd hækki vexti nú í maí. Verðlagning á styttri enda vaxtarófsins er að gera ráð fyrir dekkri sviðs­mynd, þ.e. frekari vaxta­hækkunum, og því mætti spyrja sig hvort tækifæri leyndust þar og í milli­löngum bréfum,“ segir Gunnar. Kjara­samningar gætu vegið þungt Helsti þátturinn sem mælir með vaxta­hækkun í maí er óvissa á vinnu­markaði og endur­skoðun kjara­samninga í haust. Endur­skoðunarákvæði kjara­samninga gæti komið til álita í ágúst og óvissa um launaþróun gæti því vegið þungt í mati peninga­stefnu­nefndar. Gunnar Örn setur þó spurningar­merki við samnings­stöðu verkalýðs­hreyfingarinnar ef at­vinnu­leysi heldur áfram að aukast og dregur úr fjölgun nýrra starfa. Hann nefnir sér­stak­lega stöðu er­lendra ríkis­borgara á vinnu­markaði, en at­vinnu­leysi í þeim hópi sé um 10% ef marka megi tölur Vinnumála­stofnunar, og því velti hann fyrir sér hvort verkalýðs­for­ystan hafi áhuga á ein­hverjum átökum í haust, sér í lagi ef staðan á bygginga­markaði verði jafn­vel enn brot­hættari þá. Sjá einnig „Eykur frekar líkur á því að minna skref verði tekið“ Verðlagning ríkis­bréfa sýnir að markaðurinn gerir enn ráð fyrir háu vaxta­stigi næstu misserin, þótt ávöxtunar­krafan lækki eftir því sem horft er lengra fram á tímann. Vaxtakúrfan er þannig vel niður­hallandi; stystu óverð­tryggðu ríkis­bréfin bera nú kröfu í kringum 8%, en krafan lækkar á lengri bréfum. Það bendir til þess að fjár­festar verð­leggi áfram mjög aðhalds­sama peninga­stefnu til skemmri tíma en vænti þess að vextir lækki þegar líður á tíma­bilið og færist nær jafn­vægi.