Lovísa Oktovía Eyvindsdóttir, stjórnmálafræðingur og varaþingmaður, skipar fyrsta sæti á lista Viðreisnar á Akureyri fyrir sveitarstjórnarkosningar í vor. Félagsfundur Viðreisnar á Akureyri staðfesti tillögu uppstillinganefndar um röðun á lista í kvöld. Elías Gunnar Þorbjörnsson, skólastjóri Giljaskóla, verður í öðru sæti og Þóroddur Ingvarsson, svæfinga- og gjörgæslulæknir, í því þriðja. Í fjórða sæti verður Elísabet Ögn Jóhannsdóttir, verkefnastjóri menningarmála hjá Akureyrarbæ. Skýr sýn um hvernig Akureyri eigi að þróast „Viðreisn mun setja fókus á þjónustu við íbúa, með sérstaka áherslu á börn og skólamál,“ segir Lovísa Oktovía í tilkynningu. „Við þurfum fjölbreyttari úrræði fyrir börn, bæði á skólatíma og utan. Það þarf líka að auka stuðning við okkar góða fagfólk sem vinnur með börnum. Hvað varðar samfélagið í heild, þá horfir Viðreisn á það að stíga inn í bæjarstjórn, í fyrsta sinn, með skýra sýn um hvernig Akureyri á að þróast. Við viljum að aðgengi íbúa að mikilvægri þjónustu sé í forgrunni. Við horfum líka mjög til nýrrar borgarstefnu um það hvernig umhverfið á að vera fyrir íbúa, fyrirtæki og gesti. Við viljum stuðla að samfélagi, þar sem vel er tekið utan um fólk með mismunandi þarfir og væntingar til lífsins,“ segir Lovísa Oktovía.