Félag atvinnurekenda (FA) og Íslensk-evrópska verslunarráðið (ÍEV) leggja til að stjórnvöld samþykki innleiðingu einföldunargerða þegar kemur að EES-reglum og aðgerðir gegn gullhúðun. Smíða þurfi þá aðgerðaráætlun um forgang einföldunaraðgerðanna. Tillögur þess efnis voru á meðal umræðuefna á árlegum fundi FA og millilandaviðskiptaráða félagsins með utanríkisráðuneytinu fyrr í vikunni. Samtökin hafa sent utanríkisráðherra, forsætisráðherra, atvinnuvegaráðherra og formanni utanríkismálanefndar tillögurnar , sem eru fimm talsins. Bent er á að framkvæmdastjórn Evrópusambandsins hafi lagt áherslu á að einfalda regluverk og létta reglubyrði atvinnulífs í aðildarríkjunum með svokölluðum Omnibus-pakka einföldunaraðgerða. Stór hluti hinna einfölduðu reglna verði tekið upp í EES-samninginn og innleitt í íslenska löggjöf. Í erindi FA segir að þótt einföldun EES-regluverksins sé fagnaðarefni, sé sú innleiðing þó ekki án vandkvæða. Svokallaður innleiðingarhalli hafi löngum verið vandamál á Íslandi og í Noregi þar sem það tekur of langan tíma að innleiða reglur sem teknar hafa verið upp í EES-samninginn. Upptökuhallinn, sem felur í sér bið á upptöku nýrra gerða, sé ekki síður vandamál en á sjöunda hundruð reglugerðir og tilskipanir bíða upptöku í EES-samninginn. Listinn hafi sjaldan verið lengri. „Þegar nýja regluverkið er minna íþyngjandi en það gamla skapast sú hætta að ef innleiðingin er ekki hröð og skilvirk, þurfi íslenzk fyrirtæki að starfa eftir regluverki sem er meira íþyngjandi en það sem keppinautar þeirra í öðrum EES-ríkjum búa við. Slíkt skaðar að sjálfsögðu samkeppnishæfni íslenzkra fyrirtækja,“ segir í erindi FA til stjórnvalda. Í erindinu lýsa FA og ÍEV áhyggjum af sífellt þyngra regluverki atvinnulífsins og tilhneigingum til gullhúðunar EES-gerða, þ.e. að bætt sé við þær séríslenskum, íþyngjandi ákvæðum. Samtökin benda á að tillögum starfshóps utanríkisráðherra, sem áttu að vinna gegn gullhúðun, hafi ekki verið fylgt eftir sem skyldi. Íslensk fyrirtæki hafi á undanförnum misserum fjárfest háar fjárhæðir í gögnum, kerfum, þekkingu og ráðgjöf til að búa sig undir kröfur, sem við blasir að verði úr gildi fallnar eftir fáein misseri, að sögn samtakanna. Litla leiðbeiningu hafi aftur á móti verið að hafa frá viðkomandi stjórnvöldum um hvernig fyrirtækin eigi að bregðast við fyrirsjáanlegum breytingum eða hvernig eftirliti með hlítni við löggjöfina verði háttað. „Það er ekki nóg að setja á fót starfshópa, sem komast að þeirri niðurstöðu að gullhúðun EES-gerða sé vandamál og nauðsynlegt sé að vinda ofan af henni. Það verður að hrinda tillögum þeirra í framkvæmd og einhver aðili á vegum stjórnvalda þarf að hafa það hlutverk að fylgja tillögunum eftir og tryggja að farið sé að þeim. Samtökin leggja til að eftirfylgni með tillögum hópsins verði jafnframt hluti af þeirri aðgerðaáætlun, sem lögð var til hér að ofan,“ segir í erindinu. Tillögur FA og ÍEV til stjórnvalda fela í sér að einföldunaraðgerðir fái forgang hjá sameiginlegu EES-nefndinni og verði settar í forgang innan Stjórnarráðsins, þar sem tryggt verði að vinnsla innleiðingafrumvarpa taki skamman tíma. Setja ætti þá fortakslausu reglu að einföldunargerðirnar verði innleiddar með hreinum innleiðingarfrumvörpum og hvers konar gullhúðun komi einfaldlega ekki til greina. Frumvörpum til innleiðingar einföldunargerða verði veittur forgangur í störfum Alþingis og tillögum starfshóps utanríkisráðuneytisins um aðgerðir gegn gullhúðun verði hrint í framkvæmd og þær teknar upp í samþykkt ríkisstjórnarinnar um undirbúning og frágang stjórnarfrumvarpa og reglur Alþingis um þinglega meðferð EES-mála. Þá verði ráðgjafanefnd um opinberar eftirlitsreglur skipuð á ný og fengið það hlutverk að fylgja því eftir að gullhúðun sé ekki beitt við innleiðingu EES-reglna, eða þá að settur verði á fót nýr samráðsvettvangur atvinnulífs og stjórnvalda sem hafi sama hlutverk.