Fjölþjóðleg ráðstefna hefst í París í dag þar sem fjallað verður um leiðir til að ýta undir frekari notkun kjarnorku í borgaralegum tilgangi, fyrst og fremst í raforkuframleiðslu. Emmanuel Macron Frakklandsforseti opnar ráðstefnuna sem skipulögð er af Alþjóðakjarnorkumálastofnuninni og Alþjóðaorkustofnuninni. Báðar telja unnt að tvöfalda rafmagnsframleiðslu í kjarnorkuverum fyrir árið 2050. Um það bil níu prósent raforku heimsins koma frá slíkum verum. Kínverjar eru að smíða 29 kjarnaofna til viðbótar við þá 57 sem fyrir eru. Rafael Grossi, framkvæmdastjóri Alþjóðakjarnorkumálastofnunarinnar, segir um fjörutíu ríki þegar tekin að byggja eða undirbúa fjölgun kjarnakljúfa. Það eru einmitt fulltrúar fjörutíu ríkja og alþjóðastofnana sem sækja ráðstefnuna. Erindrekar frá Kína og Bandaríkjunum eru þar á meðal en Rússar eru fjarri góðu gamni vegna innrásarstríðsins í Úkraínu. Fukushima-kjarnorkuslysið í Japan árið 2011 kynti undir þeim ótta við áhættuna sem fylgir kjarnorkuverum, sem kviknaði eftir Tsjernobyl-slysið í Úkraínu árið 1986. Áhugi á notkun kjarnorku hefur aukist á ný eftir að ríki heims urðu uggandi um yfirráð yfir eigin orkumálum á sama tíma og þau leita leiða til að nota hreinni orku til að bregðast við loftslagsbreytingum. Árásarstríð Bandaríkjanna og Ísrael á Íran virðist hafa kveikt á ný vangaveltur um hve heimsbyggðin reiðir sig á jarðefnaeldsneyti.