Vinnuveitendur geta verið í lykilstöðu til að hjálpa þolendum heimilisofbeldis. við að komast út úr aðstæðum. Ný tegund tryggingar á að koma til móts við fólk sem þarf leyfi í slíkum aðstæðum. Stuðningur vinnuveitenda getur skipt sköpum við þolendur ofbeldis í nánum samböndum. Ný slysatrygging, stuðningsleyfi, á að auðvelda vinnustöðum að styðja við þolendur. Stuðningsleyfi er viðbót tryggingafélagsins Varðar við slysatryggingar fyrirtækja og með því fá atvinnurekendur bætur fyrir launað leyfi starfsmanns í allt að tvær vikur. Tilgangurinn er að fólk, sem er að vinna sig út úr ofbeldi í nánu sambandi geti breytt aðstæðum sínum án þess að óttast tekjutap. Í leyfi án launataps „Þá getur atvinnurekandi stutt við starfsmanninn og sent hann í leyfi án þess að starfsmaðurinn tapi launum,“ segir Guðbjörg Heiða Guðmundsdóttir forstjóri Varðar. Hugmyndin kom frá nokkrum fyrirtækjum hér á landi sem hafa bætt stuðningi við þolendur ofbeldis í mannauðsstefnu sína. „Við hittum félögin sem eru búin að gera þetta og líka fagaðilana, sem eru að vinna að þessu,“ segir Guðbjörg. Vinnuveitendur leita til Bjarkarhlíðar Haldnir verða fræðslufundir fyrir stjórnendur og almenning um hvaða einkenni geti birst á vinnustöðum og viðbrögð við þeim. Það verður gert í samstarfi við Bjarkahlíð - miðstöð fyrir þolendur ofbeldis. „Vinnustaðurinn er oft eini staðurinn þar sem einstaklingurinn getur upplifað öryggi í að segja frá og þar sem eru einstaklingar sem geta gripið hann,“ segir Jenný Kristín Valberg teymisstýra í Bjarkarhlíð. Nokkuð er um að vinnuveitendur leiti til Bjarkarhlíðar og leiti ráða um hvernig þeir geti aðstoðað starfsmenn sem eru þolendur ofbeldis. „Það er verið að hjálpa þeim að koma í Bjarkarhlíð, hjálpa þeim að bóka tíma, vegna þess að ef það er verið að fylgjast með símanum þínum, bæði staðsetningu og við hvern þú ert að tala, þá geturðu ekki bókað tíma sjálfur. Þá hafa þau jafnvel keyrt fólk í Bjarkarhlíð, vegna þess að það er verið að fylgjast með bílunum líka,“ segir Jenný. Á vefsíðu Bjarkarhlíðar eru tilgreind merki um hvort starfsmaður gæti verið þolandi ofbeldis og meðal þeirra eru: Auknar fjarvistir, óstundvísi eða skert einbeiting. Einangrun eða skyndileg breyting á hegðun og/eða útliti Óvenju mörg símtöl, skilaboð eða óvelkomnar heimsóknir geranda á vinnustað. Endurtekin meiðsli eða ótrúverðugar skýringar á þeim. Gerendur og þolendur eru allsstaðar Jenný segir mörg dæmi um að vinnustaðir hafi stigið mjög vel inn og verið lykilaðilar í að hjálpa fólki við að komast út úr þessum aðstæðum. „Það geta allir orðið fyrir þessu - gerendur og þolendur eru allsstaðar í umhverfinu okkar. Og þeir eru líklega á vinnustað flestra.“ Fólk getur horfið af vinnumarkaði BSRB, Félag íslenskra hjúkrunarfræðinga og ASÍ héldu málþing í síðustu viku um ofbeldi í nánum samböndum og vinnumarkaðinn. Dagný Aradóttir Pind lögfræðingur BSRB er ein þeirra sem hélt erindi á málþingi. Hún segir að áhrif ofbeldis í nánum samböndum hafi ýmis áhrif á vinnumarkaðinn, til dæmis frammistöðu fólks og hvernig það mætir í vinnu. „Það getur jafnvel horfið af vinnumarkaði,“ segir Dagný. Hún segir að þetta sé ný nálgun og ný umræða; að ræða málefni þolenda ofbeldis á vettvagi vinnumarkaðar. „Alþjóðlega hefur orðið mikil þróun, síðustu fimm ár en hér á Íslandi, þrátt fyrir að við höfum mikið talað um kynbundið ofbeldi, þá höfum við kannski ekki beint sjónum okkar að vinnumarkaðnum.“ Stefna á meira samstarf Dagný segir að BSRB stefni á meira samstarf í þessum málaflokki bæði við stjórnvöld og fyrirtæki. „Stjórnvöld hafa tekið jákvætt í þetta, þó við séum ekki búin að hefja samtal. Að sama skapi þurfum við að ná samtali við atvinnulífið. Þetta skref sem Vörður steig mun jafnvel auðvelda fyrirtækjunum að stíga inn í þetta.“