Endurvinnslustöðvar Sorpu í Janfaseli í Reykjavík og á Dalvegi í Kópavogi munu hætta að taka móti rúmfreku rusli þann 31. mars nk. vegna framkvæmda. Í tilkynningu frá Sorpu segir að ruslið sem um ræðir sé til að mynda múrbrot, timbur, innréttingar, flísar og ónýt húsgögn. Aðeins verður tekið á móti almennu rusli sem fellur til frá heimilum á þessum stöðvum og verða stöðvarnar í Jafnaseli og á Dalvegi skilgreindar sem litlar endurvinnslustöðvar sem taka á móti 30 flokkum í stað 40 eins og undanfarin ár. Áfram verður tekið á móti öllu rusli á stóru endurvinnslustöðvum Sorpu í Ánanaustum, Blíðubakka, Breiðhellu og Sævarhöfða. Sorpa hefur jafnframt lengt opnunartíma endurvinnslustöðva sinna en þær opna nú allar kl. 09:00 og eru opnar til 19:00 alla daga nema endurvinnslustöðinni í Blíðubakka sem opnar kl. 12:00 og lokar kl. 18:30. Sjá einnig Bjóða leigjendum sendibíla upp á endurgreiðslu „Markmið þessara breytinga er að einfalda móttöku, stytta biðtíma og bæta nýtingu á starfssvæði stöðvanna á Dalvegi og í Jafnaseli. Endurmörkun stöðvanna byggir á vinnu starfsfólks SORPU og sveitarfélaganna sem að henni standa, og stjórnar SORPU. Stöðvarnar hafa um nokkra hríð verið of litlar til að taka á móti öllum þeim gestum sem á þær koma og þarf því að takmarka þann fjölda flokka sem tekið verður á móti á þeim. Stöðvarnar hafa verið í rekstri frá árinu 1991 og var þá ætlað að taka á móti átta flokkum,“ segir Gunnar Dofri Ólafsson, sviðsstjóri þjónustu- og samskiptasviðs Sorpu. Eftirfarandi flokkar verða teknir út við Dalveg og Jafnasel og þurfa íbúar á höfuðborgarsvæðinu að fara með þá flokka á stórar endurvinnslustöðvar: Málað timbur Ómálað timbur Hjólbarðar Flísar Hreinlætistæki Rúðugler Gifs Möl og sandur Heyrúlluplast Grófur úrgangur eins og ónýt húsgögn og rúmdýnur Stórir málmhlutir eins og ónýt reiðhjól og gasgrill