Ísraelski forsætisráðherrann Benjamín Netanjahú sagði á blaðamannafundi í gærkvöld sigur gegn Íran vísan, sem væri á barmi tortímingar og óljóst hverjir ráði þar ríkjum á sama tíma og íslamska lýðveldið gerir stórfelldar árásir á gas- og olíuvinnslur í ríkjunum við Persaflóa. Þær og tangarhald Írans á Hormússundi hefur haft veruleg áhrif á olíu- og gasverð. Netanjahú sagði jafnframt að vopnabúri Írana, eldflaugum og drónum, hefði að stórum hluta verið grandað og verði gereytt. Netanjahú sagði jafnframt að Íranir gætu hvorki auðgað úran lengur né framleitt langdrægar eldflaugar. Hann sagði einnig að nýr leiðtogi Írans, Mojtaba Khamenei, hefði ekki látið sjá sig enn þá og að brestir væru komnir í klerkastjórnina og á vígvellinum. Netanjahú fagnaði samstarfinu við Donald Trump Bandaríkjaforseta og sagði stríðinu ljúka mun fyrr en almennt væri talið án þess að tíunda það frekar. Bandaríkjastjórn hefur sagt að engin tímamörk séu á lokum stríðsins gegn Íran sem hófst fyrir tæpum hálfum mánuði.