Í Þetta helst í dag er áfram fjallað um atvinnuleysi og atvinnuhorfur hér á landi. Skráð atvinnuleysi í síðasta mánuði var 4,9 prósent og stóð í stað á milli mánaða. Sjónum er sérstaklega beint að atvinnuleysi á Suðurnesjum þar sem það er mest, 8,8 prósent. Formaður Verkalýðs- og sjómannafélags Keflavíkur og nágrennis segir félagsmenn vera svartsýnni á atvinnuhorfur en áður. Hún telur að færri komi hingað til lands vegna efnahagsástands og óvissu. „Við erum vön þessum sveiflum og fólk er jafnvel alveg vant því að það er í einhverri vinnu í sex mánuði, fer svo jafnvel í aðra vinnu næstu sex mánuði, og síðan í sína vinnu aftur, en nú talar fólk um að það sé ekki að fá störfin sín aftur og jafnvel ekki að fá nein svör þannig að mér finnst fólk vera svartsýnna með það hvort að það sé að fara að fá vinnu núna í vor eins og það er vant,“ segir Guðbjörg Kristmundsdóttir, formaður Verkalýðs- og sjómannafélags Keflavíkur og nágrennis. „Manni heyrist að fyrirtækin séu ekki að taka eins mikið inn af sumarafleysingafólki eða bara að ráða inn eins og er vanalega. Þannig að maður er svona svartsýnni og félagsmennirnir mínir eru svartsýnni,“ bætir hún við. Unnið við að styðja við fjölbreytta atvinnuuppbyggingu Eins og áður sagði mældist atvinnuleysi á Suðurnesjum 8,8 prósent í febrúar. Til samanburðar má nefna að atvinnuleysi þar var 7,8 prósent í febrúar í fyrra, 6,9 prósent á sama tíma árið 2024 og 5,8 prósent árið 2023. Halldóra Fríða Þorvaldsdóttir, formaður bæjarráðs Reykjanesbæjar og staðgengill bæjarstjóra, segir að almennt hafi gengið vel að auka fjölbreytni í atvinnulífinu, sem hefur að mestu snúist um ferðaþjónustu og því fylgt sveiflum þar. „Auðvitað myndum við vilja að hlutirnir myndu ganga hraðar fyrir sig en við verðum bara að búa við þann raunveruleika sem er. Við höfum markvisst unnið að því að styðja við fjölbreytta atvinnuuppbyggingu, meðal annars að sækja ný tækifæri og horfa til nýsköpunar í þeim efnum, erum hér að horfa á grænan iðnað, hér er að rísa stórt landeldi, það er að byggjast upp gagnaver, við erum með líftæknifyrirtæki og ýmislegt fleira af því að við vitum að til þess að styðja við atvinnu og að minnka þessar sveiflur þá þurfum við að fjölga eggjunum í körfunni,“ segir Halldóra. Segir mjög alvarlegt ef staðan verður óbreytt næstu mánuði Eins og fram hefur komið er atvinnuleysi meðal erlendra ríkisborgara 10,4 prósent - samanborið við 2,8 prósent hjá Íslendingum – og forsætisráðherra hefur lýst áhyggjum af tvískiptum vinnumarkaði. Í Reykjanesbæ voru 1.169 atvinnulausir í síðasta mánuði, þar af 835 erlendir ríkisborgarar, eða um sjötíu prósent. „Yfir sextíu prósent af okkar félagsmönnum er fólk sem kemur að utan. Þetta er fólkið sem er að vinna í þessum ferðaþjónustustörfum þannig að þess vegna eru þau að missa vinnuna eða ekki að fá vinnu. Þau eru minna að vinna í opinbera geiranum eða þessum störfum sem eru allan ársins hring þannig að hjá okkur er þetta að skella mjög hart á þennan hóp,“ segir Guðbjörg. „Þeir hafa ekki um margt annað að velja. Ef þeir fá ekki vinnu á vellinum eða í ferðaþjónustunni hafa þeir ekkert að neinu öðru að leita.“ „Ég kvíði því að fylgjast með atvinnuleysistölum næstu tvo mánuði því ég er svolítið hrædd um að þær eigi ekkert eftir að lækka mikið. Maður sér það bara ef maður skoðar mælaborðið hjá Vinnumálastofnun að það eru svo skarpar lækkanir. Í ágúst var 5 prósent atvinnuleysi hérna á Suðurnesjum, núna er það 8,8 prósent. Þetta eru svo skarpar sveiflur og þær hafa verið það síðan höfum við bara séð, það eru kannski háar tölur í mars og svo kemur maí og þá er það bara helmingurinn. Nú er ég svo hrædd um að þetta gerist ekki. Að við horfum á sömu töluna áfram inn í sumarið. Það er mjög alvarlegt,“ segir hún. Breytingar á vinnumarkaðslöggjöfinni Við krefjandi efnahagsástand og óvissu bætist að boðaðar hafa verið umfangsmiklar breytingar á vinnumarkaðslöggjöfinni, sem geta haft töluverð áhrif, segir Guðbjörg. Í síðustu viku var deilt um frumvarp fjármála- og efnahagsráðherra um afnám áminningarskyldu sem undanfara uppsagnar - en það sem skiptir meira máli í þessu samhengi er frumvarp félags- og húsnæðismálaráðherra um atvinnuleysistryggingar og vinnumarkaðsaðgerðir, sem nú er í nefnd, þar sem bæði er lagt til að það tímabil sem einstaklingar geta fengið greitt úr atvinnuleysistryggingasjóði verði stytt úr 30 mánuðum í átján og lágmarksskilyrðum fyrir rétti til slíkra bóta verði breytt. Þið hljótið að hafa einhverjar áhyggjur af þessari sviðsmynd miðað við atvinnuleysistölur á svæðinu? „Já, við gerum það og ég bara sjálf hef haft miklar áhyggjur. Ég hafði frumkvæði að því núna í byrjun árs að hafa samband við félags- og vinnumarkaðsráðuneytið og vildi að við myndum taka hér höndum saman og fara í einhvers konar aðgerðir og það varð til þess að ég fékk símtal í byrjun febrúar og tengingu við Unni, forstjóra Vinnumálastofnunar, og boltinn er farinn að rúlla,“ segir Halldóra. „Nú er vinnan sú að greina hverjir eru utan atvinnu og síðan verður smíðuð aðgerðaáætlun sem verður þá vonandi bara sérsniðin að okkar svæði. Við viljum sporna við þessu í eitt skipti fyrir öll,“ bætir hún við. Nánar er rætt við Guðbjörgu og Halldóru í Þetta helst í dag.