Donald Trump segist vilja „taka olíuna í Íran“ og að stjórnvöld í Bandaríkjunum gætu lagt hald á Kharg-eyju í Persaflóa, mikilvæga útflutningshöfn Írana fyrir olíu, á sama tíma og Bandaríkin senda þúsundir hermanna til Mið-Austurlanda. Í viðtali við Financial Times í gær sagði Bandaríkjaforseti að hann myndi vilja fara sömu leið í Íran og í Venesúela þar sem Bandaríkin hyggjast stjórna olíuiðnaðinum til frambúðar í kjölfar handtöku Nicolás Maduro í janúar. „Til að vera hreinskilinn við þig, þá er uppáhalds sviðsmyndin mín að taka olíuna í Íran, en sumt heimskt fólk í Bandaríkjunum segir: „Af hverju ertu að gera þetta?“ En það er heimskt fólk,“ hefur FT eftir Trump. Slík ráðstöfun myndi fela í sér að Bandaríkin þyrftu að tryggja sér yfirráð yfir Kharg-eyju, þaðan sem stærstur hluti olíu Írans er fluttur út. Trump hefur verið að efla bandarískar hersveitir á svæðinu og bandaríski herinn er að senda út 10 þúsund hermenn sem eru þjálfaðir til að taka yfir og halda landsvæði. Um 3.500 hermenn mættu á svæðið á föstudag, þar á meðal um 2.200 landgönguliðar. Aðrir 2.200 landgönguliðar eru á leiðinni auk þess sem verið er að senda þúsundir hermanna flugsveitar hersins á svæðið. Árás á Kharg-eyju yrði áhættusöm, myndi auka líkur á mannfalli hjá Bandaríkjunum, auka kostnað og framlengja stríðinu. „Kannski tökum við Kharg-eyju, kannski ekki. Við höfum marga valkosti,“ sagði Trump. „Það myndi líka þýða að við þyrftum að vera þarna [á Kharg-eyju] um einhvern tíma.“ Spurður um varnir Írans á Kharg-eyju sagði hann: „Ég held ekki að þeir hafi neinar varnir. Við gætum tekið hana mjög auðveldlega.“ Þrátt fyrir hótanir hans um að leggja hald á olíuframleiðslu Írans, lagði Trump áherslu á að óbeinar viðræður milli Bandaríkjanna og Írans, í gegnum pakistanska milliliði miði áfram. Trump hefur gefið írönskum stjórnvöldum frest til 6. apríl til að ná samkomulagi um að binda endi á stríðið, annars myndu Bandaríkin gera árásir á orkumannvirki í landinu. Spurður hvort hægt væri að ná samkomulagi um vopnahlé á næstu dögum, sem myndi opna Hormússund á ný, þar sem um fimmtungur af olíu heims fer venjulega um, neitaði Trump að veita nákvæmar upplýsingar. „Við eigum um 3 þúsund skotmörk eftir, við höfum sprengt 13 þúsund skotmörk, og nokkur þúsund skotmörk enn eftir,“ sagði hann. „Það væri hægt að komast að samkomulagi nokkuð hratt.“ Í síðustu viku sagði hann að Íran hefði leyft 10 olíuskipum undir pakistönskum fána að fara í gegnum Hormússundið sem „gjöf“ til Hvíta hússins. Hann sagði fjölda skipanna sem hefðu fengið grænt ljós hafa verið tvöfaldaðan upp í 20, sagði hann við FT sem gat ekki staðfest upplýsingarnar að svo stöddu. „Þeir gáfu okkur 10,“ sagði hann. „Núna eru þeir að gefa 20 og þessi 20 eru þegar farin af stað og sigla beint í gegnum miðju sundsins.“ Trump bætti við að sá sem heimilaði að fleiri skip færu um sundið væri Mohammad Bagher Ghalibaf, forseti íranska þingsins og einn helsti leiðtogi landsins á stríðstímum. „Munið þið þegar ég sagði að þeir væru að gefa mér gjöf? Og allir sögðu: „Hver er gjöfin? Þetta er Bull“. Þegar þeir heyrðu þetta þögðu þeir og viðræðurnar ganga mjög vel.“ Trump hélt því einnig fram að stjórnarskipti hefðu þegar átt sér stað í Íran eftir að æðsti klerkur landsins til margra ára, Ayatollah Ali Khamenei, og margir aðrir háttsettir embættismenn voru drepnir í upphafi stríðsins og í árásum sem fylgdu í kjölfarið. „Fólkið sem við erum að eiga við er allt annar hópur fólks… [þeir] eru mjög faglegir,“ sagði Trump. Trump ítrekaði einnig fullyrðingar sínar um að Mojtaba Khamenei, sonur Khameneis og nýr æðsti klerkur Írans, gæti annað hvort verið látinn eða alvarlega slasaður. „Sonurinn er annað hvort látinn eða í afar slæmu ástandi,“ sagði Trump. „Við höfum ekkert heyrt frá honum. Hann er horfinn.“ Stjórnvöld í Íran hafa hins vegar haldið því fram að þjóðhöfðinginn sé heill á húfi og við góða heilsu.