Daði Már Kristófersson, fjármála og efnahagsráðherra segir að ekki hafi verið haft samband við hann vegna aprílgabbs sem Morgunblaðið og mbl.is birti í morgun. Í frétt á síðu 2 í Morgunblaðinu í dag er sagt að hægt er að fá afslátt á kílómetragjaldinu eða það hreinlega fellt niður vegna „sérstakra aðstæðna“. Það mætti gera með því að fylla út eyðublað sem finna mætti í afgreiðslu Skattsins. Skatturinn hefur þegar tilkynnt á heimasíðu sinni að um gabb hafi verið að ræða. „Það hafa nú verið alls konar aprílgöbb í gegnum tíðina og þetta er góður gamall íslenskur siður og það að ég verði fyrir þessu einu sinni, ég get ekki erft það við fjölmiðla,“ segir Daði. Í viðtalinu sagðist Daði ekki hafa verið með í ráðum í gabbinu. Fram hefur þó komið að hann vissi þó af áætlunum MBL fyrir fram. Daði hefur staðfest þetta og segir að fjölmiðillinn hafi haft samband við hann og borið gabbið undir hann. Hann hafi að öðru leyti ekki komið nálægt því. Tilvitnanir blaðamanns MBL í Daða voru skáldaðar. Formlegri innleiðingu kílómetragjalds lokið Burtséð frá öllu glensi lauk formlegri innleiðingu kílómetragjalds í dag. Fjármálaráðherra segir að hún hafi gengið vel en ekki hafi verið gert ráð fyrir að svo margir myndu skrá kílómetrastöðu sína í hverjum mánuði. „Í stórum dráttum hefur það gengið vel en það hafa auðvitað alltaf þegar, eins og þegar stórar kerfisbreytingar eru, komið upp svona einstaka hnökrar og við erum að fara mjög vandlega yfir það og sjá hvað við getum gert enn þá betur,“ segir Daði Már Kristófersson, fjármála- og efnahagsráðherra. Röng skráning algengasta villan Samkvæmt upplýsingum frá Skattinum er ranglega skráð kílómetrastaða ein algengasta villan í kerfinu. Villur geti komið upp þegar einstaklingar skrá kílómetrastöðu sína sjálfir, þegar skoðunarstöðvar skrá stöðuna eða þegar eigendaskipti eiga sér stað og bílasalar sjá um að skrá stöðuna. Endurgreitt er beint fyrir rangar skráningar og hvetur Ævar Ísberg, starfsmaður Skattsins, fólk til að hafa samband við Skattinn í síma eða með tölvupósti til þess að láta lagfæra „Það er mjög mikilvægt að fólk sætti sig ekki við að borga of há gjöld og Skatturinn vill alls ekki leggja á of há gjöld og innheimta þau,“ segir Ævar. Daði segir að ekki hafi verið reiknað með því að margir skráðu kílómetrastöðu sína mánaðarlega. „Hversu margir velja að skrá mjög ört er svona eitthvað sem kallar á að við tökum sérstaklega tillit til þess,“ segir hann. 35 þúsund krefjast afnáms kílómetragjaldsins Rúmlega 35 þúsund hafa ritað nafn sitt á undirskriftalista þar sem þess er krafist að kílómetragjaldið verði afnumið. Þar er meðal annars nefnt að verð á eldsneyti hafi hækkað aftur eftir að gjaldið var tekið upp, kerfið sé gallað í framkvæmd og óréttlátt í grunnatriðum. Daði segir að við stórar breytingar sem auka fyrirhöfn almennings megi búast við að eftirsjá sé talin að gamla fyrirkomulaginu. Hann taki því sem hvatningu til að bæta kerfið. „Ég ætla samt að segja að beinlínis það að gjaldið sé ósanngjarnt tek ég alls ekki undir. Það er þannig að núna til margra ára hafa til dæmis raunverulega þeir sem eiga eldri bíla greitt meira fyrir notkunina á vegunum en þeir sem eiga nýja bíla. Það var ósanngjarnt, segir Daði Már. „Þetta fyrirkomulag er eiginlega það sem koma skal óháð því hvað við gerum einfaldlega vegna þess að fleiri og fleiri velja rafmagnsbíla.“ Athygli er vakin á því að í dag er síðasti dagurinn sem hægt er að skrá akstursstöðu ökutækis rafrænt til að komast hjá vanskráningargjaldi. Fréttin hefur verið uppfærð.