Síðustu verslun Húrra við Hverfis­götu verður lokað í lok apríl, sam­kvæmt til­kynningu frá fyrir­tækinu á sam­félags­miðlum. „Eftir langa og eftirminnilega vegferð höfum við tekið þá erfiðu ákvörðun að loka Húrra og versluninni okkar við Hverfisgötu í lok apríl. Það er erfitt að kveðja eitthvað sem hefur verið svona stór hluti af lífi okkar en allt hefur sitt upphaf og endi,“ segir í færslu Húrra á Facebook. Í til­kynningunni er rifjað upp að Húrra hafi hafist sem hug­mynd tveggja vina sem töldu ákveðnar vörur, vöru­merki og upp­lifun skorta í Reykja­vík. Með tímanum hafi verslunin hins vegar orðið að stærra fyrir­bæri og sett svip sinn á borgar­lífið, auk þess að vera hluti af verslunar- og tísku­senu Reykja­víkur í rúman ára­tug. Sjá einnig Húrra lokar í Kringlunni og Smáralind For­svars­menn Húrra segjast stoltir af því sem byggt var upp og þakk­látir við­skipta­vinum, sam­starfsaðilum og starfs­fólki fyrir þátt þeirra í því sam­félagi sem varð til í kringum reksturinn. Þá kemur einnig fram að á síðustu mánuðum hafi verið unnið hörðum höndum að því að halda rekstrinum gangandi, en að lokum hafi verið tekin sú þung­bæra ákvörðun að loka versluninni á Hverfis­götu. Næstu vikur verða þær síðustu í sögu Húrra. Verslunin verður opin á meðan birgðir endast og verða allar vörur seldar með helmings­afslætti. Fyrir­tækið hvetur fólk til að koma við, hjálpa til við að klára birgðirnar og kveðja Húrra Reykja­vík í síðasta sinn. Í lok til­kynningarinnar þakkar Húrra öllum þeim sem hafa lagt leið sína í verslunina í gegnum árin og segir stuðning, tryggð og vel­vild við­skipta­vina hafa haldið rekstrinum gangandi allan þennan tíma.