Eftir tæp­lega tólf ára sam­felldan rekstur þurfti teymið á bak við Húrra Reykja­vík að taka þá þungu ákvörðun að loka síðustu verslun sinni á Hverfis­götu. Að sögn Sindra Snæs Jens­sonar, eins for­svars­manna verslunarinnar, er niður­staðan fyrst og fremst af­leiðing sí­fellt erfiðara rekstrar­um­hverfis sem hafi versnað jafnt og þétt á undan­förnum árum. Sú þróun hafi orðið til þess að sjálf­stæðum sér­verslunum sé nú nær ók­leift að standa undir starf­semi sinni. Frá upp­hafi hafi Húrra starfað í harðri sam­keppni við er­lendar net­verslanir, en á síðustu árum hafi sú sam­keppni vaxið langt um­fram það sem ís­lenskar sér­verslanir ráði við. Er­lendu aðilarnir starfi við allt annað við­skipta­um­hverfi, með minni yfir­byggingu, lægri starfs­manna­kostnað og allt aðrar for­sendur til að keyra verð og af­slætti. Á sama tíma hafi markaðurinn þróast með þeim hætti að verð­sam­keppni og stöðug af­sláttar­her­ferð setji sí­fellt meiri þrýsting á inn­lenda aðila sem byggja rekstur sinn á þjónustu, sér­stöðu og vandaðri verslunar­upp­lifun. „Við erum ekki lengur bara að keppa við aðrar ís­lenskar verslanir. Við erum að keppa við er­lenda netrisa sem starfa á allt öðrum for­sendum. Þegar er­lendir aðilar geta sótt svona hratt inn á markaðinn segir það mjög mikið um það hvernig sam­keppnis­um­hverfið hefur breyst,“ segir Sindri. Sjá einnig Síðasta verslun Húrra lokar í lok mánaðar Hann segir jafn­framt að frá stofnun hafi verið lögð rík áhersla á að byggja upp traustan og tryggan við­skipta­vina­hóp, sam­hliða því að gera verslunina að lifandi hluta af borgar­lífinu og gefa eitt­hvað til baka til sam­félagsins. „Við höfum frá upp­hafi lagt okkur fram um að byggja upp góð og traust tengsl við við­skipta­vini okkar og á sama tíma reynt að gera verslunina að ein­hverju meira en bara sölu­stað heldur að stað sem gæfi líka eitt­hvað til baka til borgarinnar,“ segir hann. Sam­kvæmt Sindra versnaði staðan veru­lega á síðustu mánuðum. Desem­ber­salan var undir væntingum og fyrstu mánuðir þessa árs enn þyngri. Sú þróun haldist í hendur við stöðu hag­kerfisins hér á landi, þar sem háir vextir og verðbólga hafi þrengt að heimilum og orðið til þess að margir hafi haldið fastar um budduna. Verslun Húrra við Hverfisgötu verður lokað í lok mánaðar. Allar vörur verða seldar með helmingsafslætti á meðan birgðir endast. Hann bendir á að Húrra sé langt frá því að vera eina fyrir­tækið sem berjist í bökkum við þessar aðstæður. Á undan­förnum misserum hafi rekstrar­um­hverfi ís­lenskrar verslunar al­mennt þrengst, fram­legð veikst og svigrúm inn­lendra aðila minnkað. Sú þróun sýni að um kerfislægt ástand sé að ræða á markaði þar sem ytri aðstæður hafi orðið sí­fellt þyngri, sér­stak­lega fyrir sjálf­stæð fyrir­tæki sem standa undir húsa­leigu, launa­kostnaði og öðrum föstum rekstrar­liðum hér innan­lands. Sindri segir að innan Húrra hafi margt verið reynt til að mæta þessum aðstæðum. Reksturinn hafi verið endur­skoðaður, félagið endur­skipu­lagt og starf­semin sköluð niður í þeim til­gangi að laga hana að breyttum veru­leika. Þrátt fyrir það hafi niður­staðan á endanum alltaf verið sú sama: ytri aðstæður væru orðnar svo þungar að reksturinn næði ekki lengur að bera sig. „Við höfum reynt allt sem hægt var að reyna. Við höfum lagað okkur að nýjum veru­leika aftur og aftur, endur­skipu­lagt, minnkað um­svif og farið í gegnum erfiðar breytingar. En þegar salan fer niður, fram­legðin fer niður og kostnaðurinn heldur áfram upp, þá verður ein­fald­lega mjög lítið svigrúm eftir.“ Að lokum hafi þó ekki verið hægt að komast hjá hinu óum­flýjan­lega og því hafi verið tekin ákvörðun um að loka síðustu versluninni áður en það yrði um seinan. Næstu vikur verða þær síðustu í sögu Húrra. Verslunin verður opin á meðan birgðir endast og verða allar vörur seldar með helmings­afslætti. Mark­miðið hafi meðal annars verið að ljúka rekstrinum með ábyrgum hætti og standa eins vel og kostur var við bakið á því fólki sem að honum kom. „Þetta er auðvitað þung­bær ákvörðun, en því miður sú eina sem við gátum tekið á þessum tíma­punkti til að reyna að loka þessum kafla með eins ábyrgum hætti og unnt var,“ segir Sindri. Húrra mun á næstu dögum halda verslun sinni opinni á meðan birgðir endast og hvetur Sindri trygga við­skipta­vini síðustu ára til að koma við í síðasta sinn.