„Hugmyndin er ekki dauð eins og margir halda en upphaflega hugmyndin um stórskipahöfn með umskipun til Evrópu er að lognast út af. Í staðinn eru komnar hugmyndir um iðnaðarsvæði til að framleiða hreina orku, rafeldsneyti,“ segir Björn S. Lárusson, sveitarstjóri Langanesbyggðar, um stöðu mála í Finnafirði. Nýta hreina raforku til að framleiða vetni Íbúafundur um málefni Finnafjarðar var haldinn fyrir páska á vegum Langanesbyggðar og Vopnafjarðarhrepps. Þangað mættu meðal annars fulltrúar sveitarfélaganna og forstjóri þýska fyrirtækisins Bremenports, sem lengi hefur tengst verkefninu. Gunnar Már Gunnarsson, verkefnisstjóri innviða hjá Langanesbyggð, sagði á íbúafundinum að kjarninn í hugmyndinni um Finnafjarðarhöfn væri nú að nýta hreina raforku til að framleiða vetni. Þetta vetni mætti nýta í framleiðslu á metanóli eða ammoníaki sem orkugjafa. Ábatasamt fyrir fyrirtæki í Evrópu „Í þessa framleiðslu er koltvísýringur nýttur. Hugmyndin er þá að hann komi frá meginlandi Evrópu þar sem er þungaiðnaður. Í dag eru þessir aðilar að borga gjöld og eru að ganga frá og koma koltvísýringnum fyrir með öðrum hætti, en best væri auðvitað að nýta hann,“ útskýrði Gunnar Már. Þetta gæti verið ábatasamt fyrir fyrirtækin. Eldsneyti á íslenska flotann „Þá væri koltvísýringurinn fluttur inn til Íslands í þessa framleiðslu og framleiðslan þá á móti flutt til Evrópu eða þá auðvitað að einhverju leyti nýtt á íslenskum flota, þegar við erum komin á þann stað,“ sagði Gunnar og minnti á að þegar væru virðiskeðjur milli Íslands og Bremerhaven í gegnum sjávarútveginn. „Þarna er íslenskur fiskur fluttur inn í gegnum þessar hafnir og að einhverju leyti unninn á þessum stöðum.“ Viðræður um að nýta hliðarafurðir í landeldi Þá nefndi Gunnar hliðarafurð af vetninu sem væri súrefni og hiti sem nýta mætti í landeldi. Viðræður hefðu verið við aðila sem væru áhugasamir um það. Undirstrikað var á fundinum að um langtímaverkefni væri að ræða, jafnvel til áratuga. Mætti byrja á einfaldri bryggju „Það mætti byrja á einfaldri bryggju í Finnafjarðarhöfn sem myndi þá vera liður í því að geta byggt upp vindorkuver hérna,“ sagði Gunnar. Forsenda fyrir því væri að raforkukerfi væri til staðar. „Þegar þessir tveir þættir eru komnir er hægt að byggja upp rafeldsneytisframleiðslu, fiskeldi og svo framvegis,“ sagði verkefnisstjórinn.