Hafsteinn Hauksson, aðalhagfræðingur Kviku banka, segir langstærstan hluta aukinnar verðbólgu undanfarna fjóra mánuði stafa af liðum sem gefa takmarkaða vísbendingu um verðbólguþrýsting í hagkerfinu og liggja utan áhrifasviðs peningastefnunnar. Verðbólga hefur aukist úr 3,7% í 5,4% frá því í nóvember. Hafsteinn segir í bréfi til viðskiptavina að aðeins 0,15 prósentustig af 1,7 prósenta aukningu verðbólgunnar megi rekja til liða sem endurspegli raunverulegan verðbólguþrýsting, en ekki opinber inngrip, framboðsáhrif eða aðra tímabundna þætti. Hvað varðar helstu „sökudólgana“ fyrir aukinni verðbólgu nefnir hann opinberar gjaldabreytingar, stýrð verð, grunnáhrif vegna afsláttardaga, breyttar samkeppnisaðstæður á flugmarkaði og alþjóðlegt hrávöruverð. Stærsti einstaki sökudólgurinn samkvæmt greiningunni eru opinberar gjaldabreytingar sem höfðu 0,58% áhrif til hækkunar á vísitölu neysluverðs á tímabilinu. Sá liður skýrist að mestu af hækkun bílverða um áramót eftir vörugjaldabreytinga stjórnvalda. Þá hefur framlag flugfargjalda til verðbólgu aukist um 0,45% síðan í nóvember. Hafsteinn nefnir að það gæti endurspeglað bæði breytta samsetningu úrtaks Hagstofunnar og breyttar samkeppnisaðstæður eftir gjaldþrot flugfélagsins Play. Auk þess metur hann áhrif þess að útsölur gengu til baka á vísitöluna um 0,3% og áhrif hækkunar eldsneytisverðs vegna stríðsins í Íran á 0,16%. Mynd tekin úr bréfi Hafsteins. „Hér skal þó ekki gert lítið úr þeim verðbólguþrýstingi sem eftir stendur; það er áhyggjuefni og til marks um raunverulega tregðu að verðbólga annarsstaðar í vísitölunni sé ekki að hjaðna af meiri krafti í ljósi þess hve dregið hefur úr spennu í þjóðarbúinu,“ skrifar Hafsteinn. „Þar fara líklega saman áhrif kjarasamningsbundinna launahækkana í byrjun árs og annarrar umferðar áhrif ýmissa einskiptishækkana í skugga lausbeislaðra verðbólguvæntinga. Það er þó vert að halda því til haga að undirliggjandi tregða ber takmarkaða sök á aukinni verðbólgu undanfarið.“