Sigur Peter Magyers og Tisza-flokksins í þingkosningum í Ungverjalandi í gær hefur mikla þýðingu fyrir landið og Evrópusambandið, að mati Eiríks Bergmanns, prófessors í stjórnmálafræði. Ungverjaland hafi sveiflast töluvert milli þess að vilja vera vestrænt Evrópuríki en líka í hina áttina að harðari valdboðshyggju. Tisza-flokkurinn vann stórsigur í kosningum í gær og tryggði sér um tvo þriðju hluta þingsæta. Sextán ára valdatíð Viktors Orbans er því lokið. Eiríkur segir einkum fjórar ástæður fyrir því að þetta gerist núna. Í fyrsta lagi hafi þrengt að veskinu hjá almenningi í Ungverjalandi, verðbólga sé með því hæsta innan ESB, kaupmáttarrýrnun hafi verið töluverð og það hafi kallað fram óþol meðal almennings. Þessu til viðbótar hafi verið mikil spilling í Ungverjalandi. „Það hefur orðið meiri vitund að undanförnu meðal almennings um þessa viðamiklu spillingu og Peter Magyer hefur mikið keyrt á þetta. Hann kom að því sjálfur að afhjúpa hluta af þessari spillingu sem varð hans stökkpallur inn á svið stjórnmálanna.“ Tengsl við Pútín og Trump erfið og heimsókn Vance hafi ekki hjálpað Eiríkur segir athyglisvert að í kosningabaráttunni hafi Orban ekki nefnt efnahagsmálin, hann hafi einbeitt sér að menningarstríði utanlands. Komið hafi upp hneykslismál tengt því að utanríkisráðherra Ungverjalands hafi orðið uppvís að því að leka trúnaðarupplýsingum Evrópusambandsins til stjórnvalda í Moskvu. Tengsl við Pútín og Kreml hafi farið að verða erfið. „Síðan verður að segjast eins og er að það hvað Fidez-flokkurinn og Orban hafa hallað sér þétt upp að Donald Trump reynist ekki lengur ávinningur.“ Að einhverju leyti megi ætla að Tisza-flokkurinn hafi unnið enn stærri sigur vegna tengsla Orbans við Trump og eins vegna heimsóknar J. D. Vance varaforseta Bandaríkjanna sem hafi engan veginn hjálpað Orban og flokki hans. Bylgja tengd uppgangi Trumps byrjuð að hníga Má segja að uppgangur þjóðernispopúlisma sé liðinn undir lok? Eiríkur segir það áhugaverða spurningu sem fólk velti fyrir sér. Frá seinni heimsstyrjöld hafi risið fjórar bylgjur þjóðernispopúlisma í Evrópu og að hver þeirra hafi orðið stærri en sú fyrri. Sú síðasta hafi verið langviðamest og að hún hafi risið upp í hæstu hæðir þegar Donald Trump var kjörinn forseti Bandaríkjanna í annað sinn. „Við vorum auðvitað lengi vel með Pólland í fararbroddi þessarar bylgju líka og núna tapar Viktor Orban og þetta er meiri ósigur en fólk bjóst við og það gerist í rauninni í kjölfar þess að þessi uppgangur Donalds Trumps er augljóslega byrjaður að síga, það er ekki lengur meðbyr að vera undir pilsfaldi Trumps, heldur er það farið að breytast í andbyr og við sjáum ýmis teikn á lofti um það að þessi fjórða bylgja hafi kannski náð sínu efsta risi og sé byrjuð að síga en við þurfum að sjá margt fleira til að geta slegið því föstu.“ Telur kjör Magyers auka samheldni innan ESB Orban hefur verið andsnúinn ýmsu í stefnu Evrópusambandsins og hefur staðið í vegi fyrir lánafyrirgreiðslum til Úkraínu. Eiríkur telur að með nýjum valdhöfum í Ungverjalandi verði samheldni aðildarríkja ESB meiri. Orban hafi verið útlagi í sambandinu en nú sé sú hindrun úr veginum. Þá nefnir Eiríkur að aðildarríki ESB hafi þjappað sér enn meira saman eftir að Bandaríkin hafi dregið úr samvinnu við Evrópuríki og að undir stjórn Trumps hafi útlagaháttur Orbans orðið sífellt meira áberandi. Með nýjum stjórnvöldum komi Ungverjaland augljóslega sterkara inn í þá fjölskyldu Evrópuríkja sem ESB sé að einhverju leyti.