Laun fimm hæst launuðu æðstu yfir­mannanna hjá félögum þar sem ríkið á hlut námu að meðaltali 49,86 milljónum króna á árinu 2024, eða sem svarar um 4,16 milljónum króna á mánuði. Þetta kemur fram í svari Daða Más Kristó­fers­sonar, fjár­mála- og efna­hags­ráðherra, við fyrir­spurn Guðlaugs Þórs Þórðar­sonar á Alþingi. Hæst á listanum var Lilja Björk Einarsdóttir bankastjóri Landsbankans með 58,4 milljónir króna í árslaun, sem jafngildir tæpum 4,9 milljónum króna á mánuði. Þar á eftir kom Hörður Árnason forstjóri Landsvirkjunar með 50,3 milljónir, eða um 4,2 milljónir á mánuði, Sveinbjörn Árnason forstjóri Isavia var með 48 milljónir og Þuríður Jónsdóttir framkvæmdastjóri Sparisjóðs Austurlands með 47,4 milljónir. Árið 2024 var Guðmundur Ingi Ásmundsson forstjóri Landsnets með 45,2 milljónir króna, sem jafngildir tæpum 3,8 milljónum á mánuði. Tíu hæstu laun æðstu yfir­manna hjá þessum félögum voru þessi á árs­grund­velli: Lands­bankinn hf. — 58,4 milljónir króna Lands­virkjun sf. — 50,3 milljónir króna Isavia ohf. — 48,0 milljónir króna Spari­sjóður Austur­lands hf. — 47,4 milljónir króna Lands­net hf. — 45,2 milljónir króna Ríkisút­varpið ohf. — 37,5 milljónir króna RA­RIK ohf. — 35,1 milljón króna Ís­landspóstur ohf. — 33,4 milljónir króna Keilir ehf. — 32,9 milljónir króna Orku­bú Vest­fjarða ohf. — 29,9 milljónir króna. Sam­kvæmt svarinu átti ríkis­sjóður með beinum hætti eignar­hlut í 41 einka­hluta­félagi, opin­beru hluta­félagi, hluta­félagi eða sam­eignarfélagi árið 2024. Saman­lögð velta þessara félaga nam 301.862,2 milljónum króna og heildar­launa­kostnaður þeirra 74.373,1 milljón króna. Lang­mesta veltan var hjá Lands­bankanum, 79.005,6 milljónir króna, næst hjá Lands­virkjun með 77.362,2 milljónir og Isavia með 51.917,2 milljónir króna. Mestur launa­kostnaður var hins vegar hjá Isavia, eða 24.754,5 milljónir króna, Lands­bankanum með 16.534,3 milljónir og Lands­virkjun með 8.440,5 milljónir króna. Í svarinu er tekið fram að spurningunni um launa­kjör stjórn­enda sé svarað með launum æðsta yfir­manns hvers félags, það er for­stjóra eða fram­kvæmda­stjóra sem heyrir undir stjórn félagsins. Þarna er því ekki um að ræða meðal­tal fram­kvæmda­stjórnar eða annan æðsta stjórn­enda­hóp, heldur einungis hæst setta stjórnandann í hverju félagi. Neðar á listanum voru til dæmis æðsti yfirmaður Auðkennis með 27,9 milljónir króna í árslaun, framkvæmdastjóri Betri samgangna með 27,8 milljónir, æðsti yfirmaður Farice með 27,4 milljónir og æðsti yfirmaður Nýs Landspítala með 26,9 milljónir króna. Þá voru nokkur félög skráð með engin laun til æðsta yfirmanns, meðal annars Eignarhlutir, Sítus og Þjóðarhöll. Sérstaklega er tekið fram að starfsmaður Íslandsstofu gegni stöðu framkvæmdastjóra Icelandic Trademark Holding. Sjá má heildarlistann hér að neðan.