Mennta- og barnamálaráðherra boðaði breytingar á námsmati í grunnskólum. Formaður Kennarasambandsins segir þessa breytingu bera vott um þekkingarleysi ráðherra á málaflokknum og sakar stjórnvöld um samráðsleysi. Námsmat breytt úr bókstöfum í tölustafi Inga Sæland, mennta- og barnamálaráðherra, boðaði breytingar á einkunnarkerfi í grunnskólum á þingi Kennarasambands Íslands sem nú stendur yfir. Ráðherra sagði í erindi sínu að hún telji eðlilegt að nota tölustafi í einkunnagjöf, eins og tíðkist í framhaldsskólum og háskólum, en ekki bókstafi eða önnur form sem geti verið erfitt að skilja. Lokaeinkunn í grunnskóla hefur verið gefin í bókstöfum í tíu ár en fram að því var notast við tölustafi í námsmati. Ráðherra sagði að með því að færa einkunnagjöf aftur í tölustafi sé hún að mæta ákalli samfélagsins. „Ég veit að það er umdeilt í ykkar hópi en mér finnst það skipta máli að þetta er í samræmi við það sem meirihluti foreldra og samfélagið vill,“ sagði Inga. Hún vísaði í skoðanakönnun sem hafi verið gerð meðal almennings, þar sem mikill meirihluti sagðist vilja að tölustafir yrðu notaðir í einkunnagjöf. „Aðalatriðið er að námskvarðinn sé skýr fyrir bæði nemendur og foreldra.“ Sakar ráðherra um samráðsleysi Magnús Þór Jónsson formaður Kennarasambandsins sagðist hafa heyrt af þessum áformum fyrst í dag. „Menntamálaráðherra tilkynnti að hún ætlaði að breyta því námsmatskerfi sem hefur verið viðhaft við og um leið aðgöngumiði að framhaldsskólunum okkar. Og halda það að það sé hægt að skipta bara um það eins og að henda krónupeningi ber bara vott um þekkingarleysi.“ Þetta gangi þvert á umræðu sem hafi veri viðhöfð undanfarin ár. „Og það þykir mér leitt að við séum á þeim stað að umræðan birtist með þessum hætti.“ Magnús segir að ekki sé hægt að líta framhjá því að í vor hafi stærsti árgangur í sögunni og góður árangur hafi náðst í innritun. Það beri vott um kerfi sem virkar. „Þannig að fara inn í einhverja popúlíska leið byggða á samtölum við fólk eða skoðanakönnunum, einhverum óræðum, til að taka svona ákvörðun sem mun hafa gríðarleg áhrif inn í skólastarf og valda óöryggi er óábyrgt.,“ segir Magnús, og heldur áfram. „Það er alveg ótrúlegt að við séum að verða vön því að því er hent í okkur, svona atriðum, sem mun hafa áhrif á líf ansi margra Íslendinga án þess að hafa nokkurn fyrirvara. Og koma inn á fyrsta fund með kennurum með þeim hætti. Ég er bara ekki sáttur við þannig vinnubrögð svo ég sé alveg heiðarlegur með það.“