Dómsmálaráðuneytinu var ekki skylt að verða við beiðni RÚV um aðgang að öllum gögnum sem tengdust starfslokum Helga Magnúsar Gunnarssonar, fyrrverandi vararíkissaksóknara. Ráðuneytið hafnaði upplýsingabeiðninni vegna þess að ekki væru veittar upplýsingar um einstök starfsmannamál eða einkamál starfsfólks. Þetta kemur fram í úrskurði úrskurðarnefndar um upplýsingamál frá því fyrr í mánuðinum. Ráðuneytinu var þó gert að láta af hendi fylgigögn með gerð úttektar á starfsumhverfi hjá embætti ríkissaksóknara en ekki úttektina sjálfa. Langur aðdragandi starfsloka Í talsverðan tíma stóð styr um stöðu Helga Magnúsar hjá embætti ríkissaksóknara. Sigríður Friðjónsdóttir ríkissaksóknari hafði sent hann í leyfi og farið fram á það sumarið 2024 að hann yrði leystur frá störfum tímabundið en Guðrún Hafsteinsdóttir, þáverandi dómsmálaráðherra, komst að þeirri niðurstöðu að ekki væri tilefni til þess. Helgi Magnús hugðist snúa aftur til vinnu fyrir jólin 2024 en fékk engin verkefni í hendur. Um svipað leyti birtist yfirlýsing á vef ríkissaksóknara um að Helga Magnús skorti hæfi til að gegna embætti vararíkissaksóknara. Þorbjörg Sigríður Gunnlaugsdóttir, núverandi dómsmálaráðherra, lagði til við Helga Magnús síðasta sumar að hann yrði fluttur á milli embætta. Hann hafnaði því og lét af embætti. Hann var æviskipaður og á því rétt á svokölluðum lögmæltum eftirlaunum þar til hann verður sjötugur. Innri gögn ráðuneytis, gögn um úttekt á starfsumhverfi og gögn um flutning og starfslok Fréttastofa kærði til úrskurðarnefndar um upplýsingamál synjun dómsmálaráðuneytisins á beiðni um aðgang að gögnum um starfslok Helga Magnúsar. Úrskurðarnefnd um upplýsingamál skipti þeim gögnum sem ráðuneytið neitaði að afhenda í þrennt. Gögn um stöðu mála hjá embætti ríkissaksóknara í upphafi árs 2025. Þar á meðal er minnisblað til ráðherra um sögu málsins og stöðu mála eftir að dómsmálaráðherra ákvað í september 2024 að ekki væru forsendur til að veita vararíkissaksóknara tímabundna lausn. Gögn um úttekt á starfsumhverfi hjá embætti ríkissaksóknara sem unnin var fyrir dómsmálaráðuneytið. Gögn sem tengjast ákvörðun um flutning Helga Magnúsar úr embætti og starfslokum hans. Nefndin taldi að gögn í þriðja liðnum féllu undir undantekningu frá upplýsingalögum og þyrfti því ekki að afhenda þau. Gögnin í fyrsta lið, innri gögn úr ráðuneytinu, stæðu enn fremur í beinu samhengi við gögnin í þriðja flokknum og þyrfti heldur ekki að afhenda þau. „Efnisinnihald gagnanna varðar í meginatriðum starfssamband vararíkissaksóknara við embætti ríkissaksóknara og felur í sér eins konar upphafspunkt þeirrar atburðarásar sem lauk með starfslokum vararíkissaksóknara,“ segir í úrskurði. Viðkvæmar og persónugreinanlegar upplýsingar í úttekt um starfsumhverfi Þá staðfesti nefndin ákvörðun ráðuneytisins að láta ekki af hendi úttekt sem Mental ráðgjöf vann fyrir dómsmálaráðuneytið um starfsumhverfi hjá embætti ríkissaksóknara í fyrra. Taldi nefndin að úttektin hefði að geyma upplýsingar um auðkennanlega einstaklinga. Vegna smæðar vinnustaðarins var talið að upplýsingar í úttektinni gætu gert fólk persónugreinanlegt. Úttektin hefði að geyma margvíslegar upplýsingar um einkamál starfsmanna, til dæmis um heilsufar, andlega líðan, gildisdóma gagnvart samstarfsmönnum, persónulegar skoðanir og aðrar upplýsingar af persónulegum toga sem teljast „samkvæmt almennum sjónarmiðum svo viðkvæmar að þær eigi ekkert erindi við allan þorra manna,“ segir í úrskurði. Ráðuneytinu var þó gert að afhenda fylgiskjöl með úttektinni, svo sem trúnaðaryfirlýsingu, vinnslusamning, verktillögu og kostnaðaráætlun, auk tölvupóstsamskipta milli Mental ráðgjafar og starfsmanna ríkissaksóknara.