„Ég er að bíða eftir strætó númer 5,“ segir Sveinn Nökkvi Guðlaugsson, sem er 21 árs og býr í Norðlingaholti. Hann er vaktstjóri hjá Bónus og þjálfar handbolta hjá HK í Kópavogi. „Nú er ég að sýna ykkur leiðina sem ég væri að fara ef ég væri að þjálfa. Það eru tvær leiðir í boði með fimmunni,“ segir hann. Það þarf að koma til móts við fólkið sem notar almenningssamgöngurnar, segir ungur maður sem er stundum rúmlega klukkutíma að komast til vinnu með strætó. Kastljós fjallar um nokkur málefni sem kosið er um í sveitarstjórnarkosningum á næstu vikum. Með fimmunni getur Sveinn Nökkvi farið í Laugardalinn og þaðan í Hörðuvallaskóla þaðan sem hann labbar í Kórinn þar sem hann er að þjálfa. Hann gæti líka farið með strætó númer fimm niður í Ártún, skipt í númer 24 sem fer í Smáralind og þaðan tekið strætó 28 í Hörðuvallaskóla. Þriðji möguleikinn er að taka strætó 51 úr Norðlingaholti niður í Mjódd. Þaðan gengur strætó númer tvö í Hörðuvallaskóla. „Þetta er ekki einfalt mál fyrir einhvern sem býr í Norðlingaholti og er að koma sér í Kópavoginn. Sérstaklega miðað við lengdina sem tæki að keyra, það er mun styttra, því miður eins og staðan er í dag,“ segir Sveinn Nökkvi. Sveinn Nökkvi gafst nýlega upp á að taka strætó þessa leið og ferðast frekar með einkabíl. Í nýrri könnun Vörðu, meðal félagsfólks ASÍ og BSRB, sögðust fjórir af hverjum tíu mjög eða frekar jákvæðir gagnvart því að nota annars konar samgöngumáta en einkabíl, þriðjungur er mjög eða frekar neikvæður gagnvart því og fjórðungur hvorki né. Er stundum klukkutíma í strætó Langalgengasta ástæðan fyrir því að fólk var neikvætt fyrir öðrum samgöngumáta en einkabílnum var langur ferðatími, það nefndu sjö af hverjum tíu. Hvað ertu lengi að taka strætó? „Þetta getur verið allt frá 35 mín upp í rúman klukkutíma sko, á meðan leiðin með bíl getur verið 10 mín á góðum degi.“ Helmingur svarenda sagði að það að nota aðrar leiðir en einkabíl myndi draga úr lífsgæðum og frelsi og að leiðakerfið væri ekki nægilega gott. Yngri frekar neikvæð gagnvart almenningssamgöngum en aðrir Í kringum 40% sögðu að almenningssamgöngur væru ekki áreiðanlegar eða að þær væru ekki raunhæfur kostur og í kringum 35% sögðu að kostnaður væri of mikill. Í niðurstöðum Vörðu kemur líka fram að yngsti aldurshópurinn sé sá eini þar sem fleiri segjast vera neikvæðir gagnvart öðrum ferðamáta en einkabílum. Því er öfugt farið í öðrum aldurshópum. Sveinn Nökkvi segir að til að hann geti ferðast með strætó þurfi að vera auðveldari leið milli úthverfanna í borginni. „Þá myndi ég helst vilja taka strætóinn. Það er einfaldari lausn þannig séð, sko,“ segir Sveinn Nökkvi. Í niðurstöðum Prósents frá því í júlí segjast 42% jákvæð gagnvart Borgarlínu, 35% neikvæð og 23% hvorki né. Framkvæmdir við Fossvogsbrú eru hafnar, sem er hluti af Borgarlínu, og stefnt er að því að framkvæmdir við HR og Nauthólsveg hefjist í vor. Margir hafa áhyggjur af að það muni hægjast á umferðinni því Borgarlína eigi sums staðar eftir að taka heila akrein eins og til dæmis á Suðurlandsbraut. Þetta er gert til að vagnarnir verði ekki fastir í umferðinni líka, markmiðið er að þeir gangi á sjö til tíu mínútna fresti. „Ef það er búið að taka heila akrein bara í borgarlínuna og allir hinir bílarnir eru á akreinunum sem eftir eru, þá gæti maður dregið þetta stutta strá og endað í enn meiri traffík en maður hefði gert með einni akrein til viðbótar,“ segir hann. 50% segja ólíklegt í könnun Prósents að þau myndu nota Borgarlínuna. 38% segja líklegt að þau noti hana. Sveinn Nökkvi er ekki bjartsýnn á að borgarlínan leysi hans vandamál, það er að segja að komast á milli úthverfa, miðað við leiðakerfi Borgarlínu eins og það lítur út núna þarf hann enn að fara í Laugardal eða Mjódd til að komast svo í Kópavoginn. „Ef það væri millilína eða önnur lína sem myndi fara á milli úthverfa þá myndi ég nýta mér hana mun betur, heldur en að fara niður í bæ til að komast aftur upp eftir til að komast núna í Kópavoginn, í stað þess að fara þessa stuttu leið sem er á milli,“ segir hann. „Fyrir mitt leyti er það ekki að leysa vandann milli úthverfa. Ef einhver vill koma fram og segja mér að ég hafi rangt fyrir mér þá er ég til í að hlusta en eins og staðan er í dag þá er það ekki lausnin fyrir mig en það þýðir ekki að það hafi góð áhrif fyrir aðra.“ Borgarlínan er hluti af samgöngusáttmálanum. Hann var fyrst undirritaður 2019 af ríkinu og sex sveitarfélögum á höfuðborgarsvæðinu: Reykjavík, Kópavogi, Garðabæ, Hafnarfirði, Mosfellsbæ og Seltjarnarnesi. Meginmarkmið hans er að efla almenningssamgöngur og stytta ferðatíma. Sáttmálinn var uppfærður haustið 2024. Frá þeim tíma verður beint framlag sveitarfélaganna 1,4 milljarðar á ári til 2040 auk rúmlega 500 milljóna viðbótarframlags frá og með 2025. Sveitarfélögin á höfuðborgarsvæðinu skipta með sér kostnaði á hverju ári miðað við íbúafjölda. Af hverju betri almenningssamgöngur, hvaða ávinningur fæst með þeim? „Þá er loksins hægt að skoða hvort það sé hægt að fækka fólksbílum og svoleiðis. Ef samgöngur milli staða eru góðar þá kannski er hægt að fækka þessum fólksbílum. Þá ertu loksins búinn að leysa þennan loftslagsvanda að hluta til.“ Hvað brennur á ungu fólki fyrir þessar kosningar? „Að fá borgarstjórn sem hlustar á unga fólkið. Það hefur oftast ágætar hugmyndir eins og hver annar. “ „Ég held að það sé að sá flokkur sé tilbúinn að skoða þessar samgöngur - að það sé komið til móts við þá sem þurfa að nota samgöngurnar. Og þéttingu byggðar. Að þetta sé allt gert fagmannlega.“ Og passað upp á hvað þá? „Passa upp á hljóðmengun, sjónmengun eins og við höfum heyrt með græna gímaldið,“ segir Sveinn Nökkvi. Hvar myndir þú helst vilja búa? „Mér líður vel í úthverfunum. Að það sé stutt niður í bæ en ég geti samt haldið mínum áhugamálum áfram, geti sinnt minni vinnu en sé samt út fyrir öll stóru gatnamótin og bílana, geti komist út í mína göngutúra og hreyfingu. Þá líður mér vel í úthverfunum.“