Þann 23. febrúar var Kristrún Frostadóttir forsætisráðherra á leið til Póllands og þaðan til Úkraínu, langt ferðalag sem krafðist þess að allir yrðu á réttum stað á réttum tíma. Þegar áætlunarflug raskaðist var brugðið á það ráð að fljúga með TF-SIF, skrúfuþotu Landhelgisgæslunnar, frá Reykjavík til Póllands. Því var haldið af stað, sem leið lá í átt að Noregi, Eystrasalti og loks yfir Pólland. Ferðin var tíðindalítil þar til vélin nálgaðist flugvöllinn í Rzeszow, sem er þungamiðja herflutninga þeirra sem stutt hafa Úkraínu í stríðinu þar í landi. Í aðfluginu fór allt af stað. Kort sem sýndi hvar vélin var stökk til og frá, mikil truflun var á GPS-merki og vélin virtist allt í einu vera þrjátíu og átta sjómílur frá raunverulegri staðsetningu. Þarna reyndist einhver hafa beitt brögðum til að trufla GPS-merkið, nokkuð sem er orðið algengt á þessum slóðum. Sænska flugmálastjórnin vann skýrslu með systurstofnunum við Eystrasalt í fyrrahaust þar sem fram kom að ríflega fjórðungur flugvéla á þessum slóðum hefði greint frá svona truflunum, 123.000 flugferðir mánuðina fjóra sem þá voru rannsakaðir. Það skapar hættu, ekki síst þegar það gerist í flugtaki eða aðflugi þegar ekkert má fara úrskeiðis. Birtingarmynd breyttrar heimsmyndar Þetta er ein birtingarmynd breyttrar heimsmyndar og nýrrar ógnar, segir Auðunn Kristinsson, framkvæmdastjóri stefnumótunar, áætlana og þróunar hjá Landhelgisgæslunni. „Þetta bara sýnir okkur hvað er í gangi í heiminum og við þurfum að fara varlega og við verðum að vera með allt á hreinu,“ segir Auðunn. Að hans sögn er tiltölulega einfalt að trufla GPS-merki með búnaði sem hægt er að koma fyrir bæði á landi og í skipum. Því sé lykilatriði að treysta ekki á eitt kerfi heldur hafa fleiri kerfi til vara. Auðunn segir að í dag sé ekki lengur aðeins horft til fiskveiða og mengunar hjá Gæslunni, heldur sé viðfangsefnið fjölþáttaógnir. Þar undir falli meðal annars GPS-truflanir, áhyggjur af innviðum á borð við sæstrengi og aukin umferð skipa sem villa á sér heimildir, reyna að felast og uppfylla ekki viðeigandi öryggiskröfur. Ef slík þróun færist nær Íslandi geti hún einnig haft áhrif á siglingaöryggi. „Við sjáum skip sem virðast vera hér en eru það ekki,“ segir Auðunn. Óljóst sé hver tilgangurinn er, en ljóst að slíkt geti truflað yfirsýn yfir umferð á hafsvæðum.