Framtíð Bangladess ræðst eftir tvo daga þegar um 120 milljónir ganga til fjölmennustu kosninga ársins í heiminum. Það verður í fyrsta sinn sem kosið er í landinu eftir stúdentabyltinguna fyrir tveimur árum, þar sem öryggissveitir myrtu hundruð mótmælenda á götum úti. Þótt Sheikh Hasina hafi átt að erfa orðspor föður síns, frelsishetjunnar og landföðurins Sheikh Mujibur Rahman, stýrði hún landinu með harðri hendi. Ungt fólk í landinu fékk nóg og hrakti hana í útlegð eftir blóðug mótmæli. Við tók bráðabirgðastjórn sem boðaði til kosninga. Tveir eru líklegir til að taka við völdum. Tarique Rahman, frambjóðandi Þjóðarflokks Bangladess, er hægra megin við miðju og mælist yfirleitt með mest fylgi í skoðanakönnunum. Rétt á eftir honum er Shafiqur Rahman, sem fer fyrir Jamaat-e-Islami flokkabandalaginu. Hann talar fyrir íhaldssemi og auknum áhrifum íslamstrúar á stjórnkerfi landsins. Kannanir eru mjög óáreiðanlegar og er nær ómögulegt að spá fyrir um sigurvegara. Stjórnvöld í nágrannaríkjum Bangladess fylgjast grannt með kosningunum á fimmtudag. Í tíð Hasina blómstruðu samskipti landsins við grannana á Indlandi. Báðir flokkarnir tveir sem nefndir voru hér áðan tala fyrir minni samskiptum við Indland og auknum samskiptum við aðra nágranna; Kína og Pakistan. Það er því eiginlega öruggt að valdaskipti í landinu verði Kína og Pakistan að skapi og þá sérstaklega Pakistan ef flokkur íslamista fer með sigur. Áhrif ríkjanna tveggja í og við Bangladess, áttunda fjölmennasta ríki heims, aukast því og áhrif Indlands minnka. „Við viljum lýðræði“ Þannig er stóra myndin, en hvernig er sú smærri? Hvaða breytingar vilja kjósendur sjá heima fyrir? Endurreisn lýðræðis er efst á óskalistanum hjá flestum. „Ég vil að ríkisstjórnin komi í veg fyrir óeirðir, morð og allan annan vanda í landinu okkar,“ segir íbúi í höfuðborginni Dakka. „Við viljum lýðræði. Við viljum að réttur okkar sé viðurkenndur. Og það sem mestu máli skiptir: Við viljum réttarríki. Það er þetta sem við fölumst eftir,“ segir annar. Stærstu kosningar ársins verða haldnar á fimmtudaginn í Bangladess. Íbúar þessa fjölbýla Asíuríkis eru í dauðafæri á að koma frjálsu lýðræði á fót, eftir blóðuga byltingu fyrir tveimur árum. Þótt flestir horfi björtum augum fram á veginn eftir ógnarstjórn síðustu ára, gera það ekki allir. Með auknu fylgi tveggja stærstu flokkanna, hefur árásum í garð hindúaminnihlutans í landinu fjölgað. Hindúar telja um 8% þeirra 170 milljón manna sem búa í Bangladess. Þegar vinnufélagar Dipu Chandra Das sökuðu hann um að hallmæla Múhameð spámanni, réðst æstur múgur múslima á hann, barði til óbóta og hengdi lík hans upp tré í borginni Mymensingh. „Sonur minn var bjargarlaus. Þeir börðu hann, hengdu upp í tré og kveiktu í honum. Ég krefst réttlætis fyrir morðið á syni mínum,“ segir Shefali Rani Das, móðir Dipu Chandra. „Við viljum taka þátt í hinu lýðræðislega ferli,“ segir Ranjan Karmaker, hindúi og mannréttindafrömuður. „En vegna sífellds ofbeldis og viðvarandi refsileysis – og þeirrar staðreyndar að næstum vikulega verður hver uppákoman á fætur annarri – erum við óttaslegin. Sums staðar sjá minnihlutahópar meira að segja fram á útrýmingu.“