Innan stundar hefst íshokkíleikur Skautafélags Reykjavíkur og Fjölnis í toppdeild karla í Skautahöllinni í Laugardal. Leikurinn í kvöld verður leikinn til minningar um Patrek Frey Sveinsson, sem lést í bílslysi á Miklubraut í síðustu viku. Patrekur Freyr spilaði í undir 18 ára-liði SR en spilaði áður með Fjölni. Allur ágóði af leiknum í kvöld rennur til fjölskyldu Patreks. Hans verður meðal annars minnst í leikhléi og ætlar Hreimur Örn Heimisson söngvari að syngja. Upphitun liðanna hefst klukkan 19:15 og bæði lið hita upp í vestum merktum nafni Patreks og liðsnúmeri hans. Eftir minningarstund og mínútu þögn hefst leikurinn um klukkan 19:45.