Arnar Þór Stefánsson, hæstaréttarlögmaður hjá LEX, telur spurninguna sem bera á upp í þjóðaratkvæðagreiðslu um aðild Íslands að Evrópusambandinu vera gallaða þar sem hún innihaldi umdeilda forsendu. Til stendur að spyrja kjósendur eftirfarandi spurningar í þjóðaratkvæðagreiðslu þann 29. ágúst næstkomandi: „Á að halda áfram viðræðum um aðild Íslands að Evrópusambandinu?“ „Forsendan er sú að viðræður standi enn yfir,“ skrifar Arnar í færslu á Facebook. „Atvik þar um eru umdeild. Þannig liggur fyrir að aðildarviðræður stöðvuðust í reynd árið 2013 og svo afturkallaði þáverandi utanríkisráðherra umsóknina formlega árið 2015. Um heimildir ráðherrans til þess gernings má deila. En þar er komið að kjarna málsins. Forsendan í framangreindri spurningu er umdeild og getur kallað á að svör kjósenda við spurningunni litist af því. Mikilvægt er að spurningin sé eins skýr og kostur er svo að svör kjósenda verði afdráttarlaus. Þannig fæst marktæk niðurstaða um álitaefnið.“ Hann telur að nærtækara hefði verið að sínum dómi að spyrja eftirfarandi spurningar: „Á Ísland að hefja á ný aðildarviðræður við Evrópusambandið?” „Sú spurning er að mínu mati hlutlaus gagnvart þeim atvikum sem að framan eru rakin. Hafi viðræður stöðvast árið 2012, en umsóknin teljist samt „lifandi“, nær spurningin utan um þá aðstöðu. Þarf þá að taka afstöðu til þess hvort hefja skuli þær á ný. Teljist umsóknin hafa verið afturkölluð árið 2015 gengur spurningin einnig upp gagnvart þeirri aðstöðu.“ Arnar mætti á fund stjórnskipunar- og eftirlitsnefndar Alþingis í morgun og reifaði þessi sjónarmið þar.