Sjálf­bær lán Arion banka námu 170,8 milljörðum króna í árs­lok 2025 og lækkuðu um rúma 20 milljarða króna á milli ára. Bankinn segir lækkunina fyrst og fremst skýrast af upp­greiðslu á stóru láni á árinu. Þetta kemur fram í nýrri áhrifa­skýrslu Arion banka um sjálf­bæra fjár­mögnun á árinu 2025. Arion hefur sett sér það mark­mið að 20% af heildar­lána­safni bankans verði flokkuð undir sjálf­bæra fjár­mögnunarra­mma bankans árið 2030. Í árs­lok 2025 var hlut­fallið 12,86%. Þar af voru græn lán 10,04% af lána­safninu og lán í félags­legum flokkum 2,82%. Græn lán bankans námu 133,4 milljörðum króna í árs­lok og félags­leg lán 37,5 milljörðum króna. Til saman­burðar námu græn lán 145,3 milljörðum króna árið áður og félags­leg lán 45,7 milljörðum króna. Grænar byggingar stærsti flokkurinn Langstærsti hluti grænnar fjár­mögnunar Arion er í grænum byggingum. Þær voru 73,2% af skuld­bundinni grænni fjár­mögnun bankans í árs­lok 2025. Sjálf­bærar sjávar­nytjar og stjórnun vist­kerfa sjávar voru næst­stærsti flokkurinn, eða 13,5%, og hreinar sam­göngur voru 6,5%. Alls námu skuld­bundin græn lán 136,3 milljörðum króna í árs­lok 2025, en út­greidd græn lán námu 133,4 milljörðum króna. Fjöldi grænna verk­efna var 5.330, þar af 2.857 græn ökutæki og 2.448 grænar íbúðir eða húsnæði. Arion metur það svo að græn fjár­mögnun bankans hafi komið í veg fyrir losun sem nemur 11.722 tonnum af kol­tvísýringsí­gildum á árinu 2025. Í skýrslunni er sú losun sett í sam­hengi við 39.074 flug­miða aðra leið frá Reykja­vík til Kaup­manna­hafnar. Gáfu út græn skulda­bréf fyrir tæpa 20 milljarða Þrátt fyrir lækkun sjálf­bærra lána gaf Arion út ný græn skulda­bréf á árinu. Bankinn gaf út græn skulda­bréf í norskum og sænskum krónum fyrir sam­tals 19,7 milljarða króna árið 2025. Heildarút­gáfa grænna fjár­mála­gerninga nam 63,4 milljörðum króna í árs­lok, þar af voru græn inn­lán 24,8 milljarðar króna. Arion segir sjálf­bærar eignir bankans nema 269% af sjálf­bærum skuld­bindingum hans. Í skýrslunni eru einnig tekin dæmi um verk­efni sem falla undir græna fjár­mögnun bankans, meðal annars Hopp, Ygg­drasill Carbon, Frakkastíg 1 og ORF Ge­netics. Þar kemur fram að kol­efnis­spor íbúða­byggingarinnar á Frakkastíg 1 sé 55,7% lægra en viðmiðunar­byggingar Húsnæðis- og mann­virkja­stofnunar og að endur­nýting byggingar­efna hafi komið í veg fyrir losun sem nemur 72,1 tonni af kol­tvísýringsí­gildum.