Arion banki hagnaðist um 7,3 milljarða króna á fyrsta fjórðungi ársins, saman­borið við 6,4 milljarða króna á sama tíma­bili í fyrra. Arð­semi eigin fjár nam 13,9 pró­sentum á fjórðungnum en var 12,8 pró­sent á fyrsta fjórðungi síðasta árs. Hagnaður á hlut nam 5,33 krónum saman­borið við 4,59 krónur á sama tíma í fyrra. Af­koman litast að veru­legu leyti af miklum vaxta­tekjum. Hreinar vaxta­tekjur jukust um 34 pró­sent milli ára og námu 16,3 milljörðum króna. Vaxta­munur á vaxta­berandi eignum var 3,8 pró­sent, saman­borið við 3,1 pró­sent á fyrsta árs­fjórðungi 2025. Bankinn segir sveiflurnar einkum skýrast af áhrifum skammtíma­verðbólgu á fjórðungnum. Verðtryggingarójöfnuður bankans nam 204 milljörðum króna í lok fjórðungsins og var á svipuðu róli og í árs­lok 2025. Bene­dikt Gísla­son banka­stjóri segir í til­kynningu að af­koma bankans sé í samræmi við væntingar og mark­mið. Hann segir tekjur sam­stæðunnar byggja á fjöl­breyttum stoðum sem hafi sveiflu­jafnandi áhrif og auki áhættu­dreifingu. Þá sé sam­stæðan áfram fjár­hags­lega sterk, með góða eigin­fjár- og lausa­fjár­stöðu. Bene­dikt fjallar einnig um fyrir­hugaðan sam­runa Arion og Kviku sem ekki varð af. Hann segir að þegar for­viðræðum bankanna við Sam­keppnis­eftir­litið lauk hafi orðið ljóst að af­staða eftir­litsins væri það neikvæð að sam­runinn næði ekki fram að ganga. Í fjár­festa­kynningu segir að stefna Arion sé óbreytt eftir að viðræðunum var slitið og að bankinn muni áfram leggja áherslu á agaðan vöxt, skil­virkni og arð­semi fyrir hlut­hafa. Sjá einnig SKE blæs samruna Arion og Kviku af „Í greinum sem ég hef birt undanfarna mánuði hef ég bent á tækifæri til að stuðla að lækkun vaxta hér á landi. Eitt þessara tækifæra fólst í einföldun fjármálakerfisins með það að markmiði að lækka kostnaðinn í kerfinu. Því miður varð ljóst í síðasta mánuði, þegar forviðræðum Arion og Kviku við Samkeppniseftirlitið vegna samrunaáforma félaganna lauk, að afstaða Samkeppniseftirlitsins til samrunans væri það neikvæð að hann myndi ekki ná fram að ganga. Þar með varð ljóst að sú einföldum fjármálakerfisins sem ég tel að hefði verið æskileg og til hagsbóta fyrir viðskiptavini og hluthafa mun ekki ná fram að ganga,“ skrifar Benedikt. Samdráttur í fjárfestingarbankastarfsemi Hreinar þjónustu­tekjur námu 3,9 milljörðum króna á fjórðungnum, saman­borið við 4,5 milljarða á sama tíma í fyrra. Bankinn segir tekjur af fyrir­tækjaráðgjöf og fjár­festingar­banka­starf­semi hafa verið lægri en á síðustu fjórðungum, enda séu þær tekjur sveiflu­kenndari að eðlis­fari. Tekjur af eignastýringu hafi hins vegar reynst stöðugar og eignir í stýringu og vörslu numið 1.979 milljörðum króna í lok tíma­bilsins. Kjarna­tekjur bankans, það er hreinar vaxta-, þóknana- og trygginga­tekjur að frá­dregnum rekstrar­kostnaði trygginga­starf­seminnar, jukust um 20,3 pró­sent milli ára og námu 21,1 milljarði króna sam­kvæmt fjár­festa­kynningu bankans. Heildar­tekjur námu 19,5 milljörðum króna og jukust um 2 pró­sent milli ára. Rekstur tryggingafélagsins Varðar skilaði 60 milljóna króna tapi á fjórðungnum, saman­borið við 641 milljónar króna tap á sama fjórðungi í fyrra. Trygginga­tekjur jukust um 7,2 pró­sent milli ára, en sam­sett hlut­fall Varðar var 100,8 pró­sent saman­borið við 99,7 pró­sent á fyrsta fjórðungi síðasta árs. Hreinar fjár­muna­tekjur voru neikvæðar um 767 milljónir króna á fjórðungnum. Bankinn segir það skýrast af erfiðum markaðsaðstæðum, einkum á hluta­bréfa­markaði, og tapi af bæði skráðum og óskráðum hluta­bréfum. Á móti hafi af­koma af skulda­bréfum verið jákvæð. Rekstrar­kostnaður jókst um 13 pró­sent milli ára og nam 7,5 milljörðum króna. Í fjár­festa­kynningu bankans kemur fram að hækkunin nemi 855 milljónum króna milli ára og skýrist að hluta af ein­skiptisliðum, þar á meðal bak­færslu kaup­auka­kostnaðar á fyrsta fjórðungi síðasta árs. Launa­kostnaður jókst um 754 milljónir króna, eða 17,7 pró­sent, milli ára. Virkt skatt­hlut­fall var 33,8 pró­sent á fjórðungnum. Í kynningu bankans segir að það skýrist einkum af tapi af hluta­bréfa­eignum. Virka skatt­hlut­fallið var 32,2 pró­sent á fyrsta fjórðungi 2025. Útlán til við­skipta­vina jukust um 23 milljarða króna, eða 1,7 pró­sent, frá áramótum og námu 1.352 milljörðum króna í lok mars. Útlán til fyrir­tækja jukust um 1,7 pró­sent og útlán til ein­stak­linga um 1,8 pró­sent. Bankinn segir að um 9 milljarðar króna af aukningu lána­safnsins skýrist af áhrifum verðbólgu á fjórðungnum. Inn­lán við­skipta­vina jukust um 16 milljarða króna, eða 1,7 pró­sent, á fjórðungnum. Inn­lán eru áfram mikilvægasta fjár­mögnunar­leið bankans og námu 60 pró­sentum af heildar­skuldum hans í lok mars. Í kynningu kemur fram að inn­lán ein­stak­linga hafi aukist um 3,8 pró­sent á fjórðungnum, að stórum hluta vegna nýs sparnaðar­reiknings innan vildar­kerfisins. CET-1 hlutfallið vel yfir eiginfjárkröfu Efna­hags­reikningur bankans stækkaði um 1,6 pró­sent frá áramótum og námu heildar­eignir 1.784 milljörðum króna í lok mars. Lausa­fjár­staða bankans er sögð sterk; heildar­lausa­fjárþekju­hlut­fallið, LCR, var 229 pró­sent og LCR í ís­lenskum krónum var 172 pró­sent. Eigin­fjár­hlut­fall bankans var 22,5 pró­sent í lok mars og hlut­fall al­menns eigin­fjárþáttar 1, CET1, var 18,5 pró­sent. Hlut­föllin taka til­lit til óendur­skoðaðs hagnaðar fjórðungsins og væntrar arð­greiðslu sem nemur 50 pró­sentum af hagnaði, í samræmi við arð­greiðslu­stefnu bankans. Í fjár­festa­kynningu kemur fram að CET1-hlut­fallið sé 318 punktum yfir eigin­fjárkröfu. Arion greiddi 15,8 milljarða króna í arð á fjórðungnum og keypti eigin bréf fyrir 4,9 milljarða króna. Sam­tals námu arð­greiðslur og kaup eigin bréfa því 20,7 milljörðum króna á fjórðungnum.