Landsbankinn hagnaðist um 11,2 milljarða króna á fyrsta ársfjórðungi, samanborið við 7,9 milljarða hagnað á sama tíma í fyrra. Arðsemi eiginfjár var 13,5% samanborið við 10,0% á sama tímabili árið áður. Lilja Björk Einarsdóttir, bankastjóri Landsbankans, bendir í afkomutilkynningu á að verðbólga á fyrsta fjórðungi hafi verið óvenjuhá eða 10,3% á ársgrundvelli, samanborið við 4,2% á sama tíma í fyrra. Það hafi litað afkomuna á fjórðungnum. „Áhrifa verðbólgu, hárra vaxta og alþjóðlegs óróa gætir í uppgjöri bankans. Vegna aukinnar óvissu eykst framlag vegna virðisrýrnunar útlána. Við mat á virðisrýrnum lítum við til mögulegra áhrifa á heimili og helstu atvinnugreinar og færum varúðarframlag til að vera viðbúin áföllum en vanskil eru áfram lítil.“ Hrein virðisrýrnun fjáreigna nam 1.625 milljónum króna á fyrstu þremur mánuðum ársins, samanborið við 331 milljónar króna virðisrýrnun á fyrsta fjórðungi 2025. Í skýrslu stjórnar segir að aukningin sé að hluta til vegna endurmats og breytinga á vægi sviðsmynda í ljósi vaxandi óvissu í alþjóðlegu efnahagsumhverfi. Lilja bendir á að útlán Landsbankans til fyrirtækja námu 1.018 milljörðum króna í lok mars. „Í uppgjörinu er fjallað um stöðu byggingarverkefna sem bankinn hefur lánað til en veðstaða þeirra er almennt góð og hefur heldur batnað undanfarin ár. Ljóst er að hátt vaxtastig hefur veruleg áhrif á öll fyrirtæki en ekki síður á þá einstaklinga og fjölskyldur sem eru að reyna að kaupa sína fyrstu íbúð eða stækka við sig, enda er erfiðara að standast greiðslumat. Þetta endurspeglast í því að íbúðalán hjá bankanum stóðu nánast í stað á fjórðungnum, íbúðir seljast hægar hjá verktökum og meira er um óbyggðar lóðir.“ Hún bendir á að samsetning nýrra íbúðalána hafi breyst mikið undanfarið ár. Nú beri svo við að nánast öll ný íbúðalán sem bankinn veitti á tímabilinu voru óverðtryggð „enda hefur bankinn takmarkað framboð á verðtryggðum lánum en lagt í staðinn kapp á að veita hagstæðustu óverðtryggðu íbúðalánin“. Um fjórðungur af nýjum íbúðalánum Landsbankans það sem af er ári eru með fasta vexti til 12 mánaða og um helmingur nýrra lána er á föstum vöxtum til 5 ára, sem eru 8,20%. Rekstrartekjur Landsbankans námu rúmlega 24 milljörðum króna á fyrsta ársfjórðungi og jukust um 4,9 milljarða eða 25,6% milli ára. Mestu munaði um að hreinar vaxtatekjur jukust um 39,3% og námu 20,6 milljörðum króna. Kostnaðarhlutfall samstæðunnar var 30,3%, samanborið við 38,7% á sama tímabili árið 2025. Landsbankinn rekur lækkun hlutfallsins til þess að tekjur jukust en kostnaður hélst stöðugur. Eignir Landsbankans námu 2.335 milljörðum króna í lok fyrsta ársfjórðungs og bókfært eigið fé var um 320 milljarðar. Eiginfjárhlutfall í lok tímabilsins var 24,8% en fjármálaeftirlit Seðlabanka Íslands gerir heildarkröfu um 20,3% eiginfjárgrunn.