Hagnaður Ís­lands­banka nam 7,5 milljörðum króna á fyrsta árs­fjórðungi ársins, saman­borið við 5,2 milljarða króna á sama tíma í fyrra. Arð­semi eigin fjár var 13,6% á árs­grund­velli, saman­borið við 9,4% á fyrsta fjórðungi síðasta árs. Hreinar vaxta­tekjur jukust um 4,2 milljarða króna milli ára og námu 17,1 milljarði króna á fjórðungnum. Vaxta­munur af heildar­eignum var 3,9%, saman­borið við 3,2% á fyrsta fjórðungi í fyrra. Í fjár­festa­kynningu bankans kemur fram að hækkun vaxta­munar skýrist að stærstum hluta af áhrifum verðbólgu á fjórðungnum. Þar segir að 66 punktar af 73 punkta hækkun vaxta­munar megi rekja til meiri verðbólguáhrifa. Jón Guðni Ómars­son, banka­stjóri Ís­lands­banka, segir í til­kynningu að af­koman hafi verið yfir væntingum. „ Hagnaður af rekstri Íslandsbanka nam 7,5 milljörðum króna á fyrsta ársfjórðungi og arðsemi eigin fjár á ársgrundvelli var 13,6%, sem er í báðum tilvikum yfir spám greinenda fyrir fjórðunginn. Aukning í vaxtatekjum, sem voru rúmum 11% yfir spám greinenda, skýrir að stórum hluta aukinn hagnað samanborið við fyrsta ársfjórðung síðasta árs, “ segir Jón Guðni. Hann segir aukningu vaxta­tekna skýra að stórum hluta aukinn hagnað frá sama tíma í fyrra. Vaxta­tekjurnar hafi verið rúmum 11% yfir spám grein­enda. „Af­koma af kjarna­rekstri sýnir að undir­stöðurnar í rekstri bankans eru sterkar,“ segir Jón Guðni. Verð­tryggingarójöfnuður bankans var um 201 milljarður króna í lok fjórðungsins sam­kvæmt fjár­festa­kynningu og hafði verið stöðugur í kringum 200 milljarða króna undan­farna fjórðunga. Í árs­hluta­reikningi segir að búast megi við sveiflum í af­komu vegna ár­stíðar­sveiflna í verðbólguáhrifum, sem hafi til­hneigingu til að vera meiri á fyrri hluta ársins en þeim síðari. Hreinar þóknana­tekjur námu 3,3 milljörðum króna og jukust um 6,6% milli ára. Þær voru þó undir áhrifum af minni um­svifum á fjár­magns­markaði. Í árs­hluta­reikningi kemur fram að tekjur af fjár­festingar­banka­starf­semi og eignastýringu hafi orðið fyrir áhrifum af lægri veltu og þrýstingi á mörkuðum, en á móti hafi tekjur af útlánum og ábyrgðum aukist um 30%. Kort og greiðslumiðlun eru áfram stærsti hluti þóknana­tekna bankans. Jón Guðni segir að óvissa í alþjóð­legu um­hverfi og sveiflur á er­lendum mörkuðum hafi haft áhrif á þóknana­tekjur á fjórðungnum. Minni um­svif á markaði hér á landi hafi einnig haft áhrif, en þóknana­tekjurnar hafi engu að síður verið hærri en á fyrsta fjórðungi í fyrra. Heildar­tekjur bankans námu 20,3 milljörðum króna, saman­borið við 15,5 milljarða króna á sama tíma í fyrra. Stjórnunar­kostnaður nam 7,8 milljörðum króna og hækkaði úr 7,4 milljörðum króna. Kostnaðar­hlut­fallið lækkaði hins vegar veru­lega milli ára og var 38,5%, saman­borið við 47,6% á fyrsta fjórðungi í fyrra. Virðis­rýrnun fjár­eigna yfir milljarð Launa­kostnaður og tengd gjöld hækkuðu um 123 milljónir króna milli ára, eða 2,7%, sem bankinn segir vera minna en bæði verðbólgu og al­mennar launa­hækkanir sam­kvæmt kjara­samningum. Á fjórðungnum gjald­færði bankinn 247 milljónir króna vegna kaup­auka­kerfis starfs­manna og 58 milljónir króna vegna hluta­bréfa­tengds hva­ta­kerfis, sam­tals 305 milljónir króna. Að teknu til­liti til þess hafi launa­kostnaður lækkað um 4% milli ára á sam­bæri­legum grunni. Virðis­rýrnun fjár­eigna nam 1.219 milljónum króna á fjórðungnum, saman­borið við 3 milljónir króna á sama tíma í fyrra. Áhættu­kostnaður útlána var 35 punktar á árs­grund­velli, sem er yfir langtíma­mark­miði bankans um 20 til 25 punkta yfir hag­sveifluna. Í árs­hluta­reikningi segir að virðis­rýrnunin skýrist einkum af einstökum lána­málum og að bankinn telji þau ekki endur­spegla víðtæka þróun í lána­safninu. Þrátt fyrir það segir bankinn að áhrif lang­varandi verðbólgu og hárra vaxta séu farin að sjást. Sölutími íbúðar­húsnæðis hafi lengst, vöxtur íbúðalána minnkað og þrýstingur aukist á byggingar­geirann. Hlut­fall lána á þriðja stigi, það er lána með laskað láns­hæfi, var 2,0% í lok mars, saman­borið við 1,5% í árs­lok. Sterk lausafjársstaða Útlán til við­skipta­vina jukust um 34,1 milljarð króna frá áramótum og námu 1.401 milljarði króna í lok mars. Það jafn­gildir 2,5% vexti á fjórðungnum, eða um 10% á árs­grund­velli. Í árs­hluta­reikningi kemur fram að vöxturinn skýrist meðal annars af aukinni áherslu bankans á alþjóð­leg útlán, einkum til inn­viða­verk­efna og sjávarút­vegs­tengdra verk­efna. Slík útlán voru 4,5% af lána­safninu í lok mars, saman­borið við um 1,5% í byrjun árs 2025. Bankinn gerir ráð fyrir að þau verði 5 til 10% af lána­safninu til framtíðar. Inn­lán frá við­skipta­vinum jukust um 4,6% á fjórðungnum og námu 1.013 milljörðum króna í lok mars. Útlán til við­skipta­vina sem hlut­fall af inn­lánum voru 138%, saman­borið við 141% í lok síðasta árs. Lausa­fjár­staða bankans er áfram sterk; lausa­fjárþekju­hlut­fallið var 177% og fjár­mögnunar­hlut­fallið 123% í lok fjórðungsins. Eigin­fjár­hlut­fall bankans var 22,5% í lok mars og hlut­fall al­menns eigin­fjárþáttar 1 var 18,6%. Hlut­fall al­menns eigin­fjárþáttar 1 var 363 punktum yfir kröfum eftir­lit­saðila, sem er yfir mark­miði bankans um 100 til 300 punkta svigrúm. Heildarút­greiðslu­geta bankans var 29,2 milljarðar króna að teknu til­liti til hagnaðar fyrsta fjórðungs og ólokinna endur­kaupa. Ís­lands­banki greiddi sam­tals 19,5 milljarða króna til hlut­hafa á fjórðungnum með arð­greiðslu og endur­kaupum eigin bréfa. Aðal­fundur samþykkti 12,6 milljarða króna arð­greiðslu og bankinn keypti eigin bréf fyrir 6,9 milljarða króna á fyrsta fjórðungi. Sjá einnig Íslandsbanki í færsluhirðingu Eftir lok fjórðungsins til­kynnti Ís­lands­banki um skipu­lags­breytingar sem eiga að auka skil­virkni, stytta boð­leiðir og ein­falda ákvarðanatöku. Gert er ráð fyrir að ár­legur launa­kostnaður dragist saman um einn milljarð króna vegna breytinganna. Áhrifin munu fyrst sjást í af­komu þriðja árs­fjórðungs og koma að fullu fram árið 2027. Í árs­hluta­reikningi kemur fram að stöðu­gildum fækki um 50 á árinu, þar með talið vegna af­náms snemm­búinna starfs­loka, sem jafn­gildir 7% fækkun frá árs­lokum 2025. Æðstu stjórn­endum fækkar um 15%, fram­kvæmda­stjórum um 20% og ákvörðunar­töku­nefndum fækkar úr ellefu í fjórar. Jón Guðni segir breytingarnar hluta af því að gera bankann betur í stakk búinn til að móta framtíð bankaþjónustu. Hann nefnir einnig stofnun þróunarfélags um nýtingu gervi­greindar. „Ætlunin er að þróa í félaginu nýjar hug­búnaðar­lausnir á kvikan og skapandi hátt,“ segir hann.