Upp­gjör Ís­lands­banka fyrir fyrsta árs­fjórðung var tölu­vert um­fram væntingar Akkurs og litast af mjög sterkum vaxta­tekjum. Þetta kemur fram í viðbrögðum Akkurs við upp­gjöri bankans. Ís­lands­banki hagnaðist um 7,5 milljarða króna á fjórðungnum, sem var 1,2 milljörðum króna um­fram spá Akkurs. Hagnaðurinn var einnig 266 milljónum króna yfir meðaltali spáa greiningaraðila. Akkur segir kjarna­tekjur og undir­liggjandi hagnað einnig hafa verið um­fram væntingar. Kjarna­tekjur, það er hreinar vaxta- og þóknana­tekjur, námu 20,4 milljörðum króna og voru 2,2 milljörðum króna yfir spá Akkurs. Undir­liggjandi hagnaður fyrir skatta nam 12,5 milljörðum króna og var 2 milljörðum króna yfir spá Akkurs. Hreinar vaxta­tekjur námu 17,1 milljarði króna á fjórðungnum og voru 2,2 milljörðum króna yfir spá Akkurs. Það jafn­gildir 14,4% fráviki frá spá. Vaxta­tekjurnar voru einnig 1,8 milljörðum króna, eða 11,4%, yfir meðaltali spáa greiningaraðila. „Vaxta­tekjur og vaxta­munur langt um­fram væntingar,“ segir í greiningu Akkurs. Vaxta­munur Ís­lands­banka var 3,9% á fjórðungnum, saman­borið við 3,2% á sama tíma í fyrra. Akkur segir stærstan hluta hækkunarinnar skýrast af verðbólguáhrifum, en tekur fram að verðbólgan skýri ekki allan batann. Þóknana­tekjur voru lítil­lega yfir væntingum. Hreinar þóknana­tekjur námu 3,3 milljörðum króna og voru 74 milljónum króna yfir spá Akkurs og nánast á pari við meðal­tal greiningaraðila. Aðrar tekjur, þar á meðal fjár­muna­tekjur, voru einnig yfir væntingum. Hrein fjár­magns­gjöld námu 213 milljónum króna á fjórðungnum, saman­borið við 986 milljónir króna á sama tíma í fyrra. Akkur segir þann lið hafa bætt af­komuna um­tals­vert milli ára, þótt greiningar­fyrir­tækið horfi al­mennt fram hjá skammtíma­sveiflum í fjár­muna­tekjum og geri ráð fyrir jákvæðri af­komu til lengri tíma. Rekstrar­kostnaður var hins vegar lítil­lega yfir væntingum. Rekstrar­kostnaður nam 7,8 milljörðum króna og var 187 milljónum króna yfir spá Akkurs. Akkur bendir þó á að leiðrétt fyrir 247 milljóna króna kostnaðarfærslu vegna kaup­auka­kerfis, sem var inn­leitt í byrjun árs, hafi rekstrar­kostnaður verið undir væntingum. Virðis­rýrnun var neikvæði punkturinn í upp­gjörinu að mati Akkurs. Hún nam 1,2 milljörðum króna og var 204 milljónum króna meiri en Akkur hafði spáð og 563 milljónum króna yfir meðaltali spáa greiningaraðila. Áhættu­kostnaður útlána nam 35 punktum á árs­grund­velli, sem er yfir framsýnu viðmiði bankans um 20 til 25 punkta yfir hag­sveifluna. Akkur segir ekki ólík­legt að virðis­rýrnun aukist tíma­bundið ef at­vinnu­leysi heldur áfram að aukast eða helst hátt og/eða ef íbúða­verð gefur eftir. Arð­semi eigin fjár Ís­lands­banka var 13,6% á árs­grund­velli á fyrsta fjórðungi. Akkur bendir á að það sé tals­vert yfir 12% áætlun bankans fyrir árið 2026. Greiningar­fyrir­tækið nefnir einnig að bankinn haldi áfram skipu­lags­breytingum sem eiga að lækka ár­legan launa­kostnað um einn milljarð króna og koma að fullu fram árið 2027. Akkur metur um­fram eigið fé Ís­lands­banka á um 33 milljarða króna, sem jafn­gildir um 13% af markaðsvirði bankans. Greiningar­fyrir­tækið bendir á að bankinn hafi staðið í tölu­verðum endur­kaupum á eigin bréfum og að þau muni halda áfram. Miðað við dagsloka­gengi í gær metur Akkur markaðsvirði Ís­lands­banka á 249 milljarða króna að teknu til­liti til eigin bréfa. Sam­kvæmt greiningunni jafn­gildir það 9,1 sinnum hagnaði síðustu tólf mánaða og 9,4 sinnum væntum hagnaði ársins 2026 miðað við síðustu spá Akkurs. Á mæli­kvarðanum verð á móti bók­færðu eigin fé er bankinn metinn á 1,17 sinnum eigið fé. „Gott upp­gjör þar sem hagnaður tíma­bilsins var tölu­vert um­fram væntingar. Kjarna­tekjur, sér­stak­lega vaxta­tekjur, bera af­komuna uppi,“ segir í niður­stöðu Akkurs.