Greiningar­fyrir­tækið Akkur gerir ráð fyrir að hreinar vaxta­tekjur Ís­lands­banka verði þær hæstu í sögu bankans á þessu ári, sam­kvæmt af­komu­spá félagsins. Þar er vísað til þess að virk verðbólga hafi reynst mun hærri á fjórðungnum en á undan­förnum fjórðungum og að það styðji við háa vaxta­myndun í rekstrinum. Í greiningunni segir að þar megi sjá af­komu­spá Akkurs fyrir árið í heild hjá Ís­lands­banka. Sam­kvæmt henni er gert ráð fyrir að hreinar vaxta­tekjur nemi 55.323 milljörðum króna á árinu 2026, saman­borið við 52.471 milljarð árið 2025. Rekstrar­tekjur alls eru á sama tíma áætlaðar 69.448 milljarðar króna, upp úr 67.240 milljörðum árið áður. Akkur spáir því jafn­framt að hagnaður fyrir skatta verði 33.737 milljarðar króna á árinu, saman­borið við 34.995 milljarða árið 2025. Hagnaður eftir skatta er áætlaður 25.446 milljarðar króna, nánast óbreyttur frá fyrra ári þegar hann nam 25.249 milljörðum. Megin­áherslan í greiningunni er þó ekki aðeins á sterkar vaxta­tekjur heldur einnig á versnandi útlánagæði. Þar segir bein­línis að „lík­legt [sé] að virðis­rýrnun aukist og verði í samræmi við vænt útlána­tap til lengri tíma þar sem at­vinnu­leysi er að aukast á sama tíma og hægjast er á fast­eigna­markaði.“ Sam­kvæmt spánni gerir Akkur ráð fyrir að virðis­rýrnun lána nemi 3,106 milljörðum króna á þessu ári, saman­borið við 681 milljón króna árið 2025. Það er ein skýrasta breytingin í spánni milli ára og vegur þungt í mati félagsins á af­komu bankans. Þá er gert ráð fyrir að rekstrar­gjöld verði nær óbreytt milli ára, eða 29.462 milljarðar króna saman­borið við 29.480 milljarða árið áður. Banka­skattur er áætlaður 2.142 milljarðar króna. Akkur teiknar þannig upp mynd af banka sem nýtur áfram mjög sterkrar kjarna­starf­semi og sögu­lega hárra vaxta­tekna, en þar sem mót­vægið kemur frá aukinni virðis­rýrnun. Í greiningunni er það tengt versnandi horfum í efna­hags­um­hverfinu, með hækkandi at­vinnu­leysi og kólnandi fast­eigna­markaði. Á árs­fjórðungs­grunni gerir Akkur ráð fyrir að hagnaður Ís­lands­banka verði mestur á fyrsta fjórðungi, eða 6,235 milljarðar króna, en fari síðan í 6,560 milljarða á öðrum fjórðungi og 6,665 milljarða á þeim þriðja áður en hann lækkar í 5,986 milljarða á fjórða fjórðungi. Spáin bendir því til þess að af­koma Ís­lands­banka verði áfram sterk á þessu ári, en að meiri þrýstingur frá útlána­safninu og lakari efna­hags­horfum fari að setja skýrari svip á reksturinn.