Tap Seðla­banka Ís­lands nam 11,3 milljörðum króna á fyrstu þremur mánuðum ársins. Eigið fé bankans lækkaði um rúma 11 milljarða á fjórðungnum og nam 65,3 milljörðum króna í lok mars. Seðla­banki Ís­lands var rekinn með 11,3 milljarða króna tapi á fyrsta árs­fjórðungi ársins, sam­kvæmt ný­birtu árs­hluta­upp­gjöri bankans fyrir tíma­bilið frá 1. janúar til 31. mars. Til saman­burðar nam tap bankans 13,6 milljörðum króna á sama tíma­bili í fyrra. Tapið var því um 2,3 milljörðum króna minna nú en á fyrsta árs­fjórðungi ársins 2025. Af­koma bankans skýrist einkum af tapi af fjár­mála­gerningum, sem nam 10 milljörðum króna á fjórðungnum. Þar vógu er­lendar virðis­breytingar eigna þungt, en þær voru neikvæðar um 5,6 milljarða króna. Inn­lendar virðis­breytingar voru neikvæðar um 251 milljón króna og gengis­munur var neikvæður um 3,8 milljarða króna. Hrein vaxta­gjöld námu 412 milljónum króna á tíma­bilinu. Vaxta­tekjur bankans voru 6,8 milljarðar króna en vaxta­gjöldin rúm­lega 7,2 milljarðar. Á sama tíma­bili í fyrra voru hreinar vaxta­tekjur jákvæðar um 90 milljónir króna. Rekstrar­gjöld bankans námu 2,5 milljörðum króna og voru nánast óbreytt frá sama tíma í fyrra. Þar af námu laun og launa­tengd gjöld rúm­lega 1,6 milljörðum króna. Eignir lækkuðu um tæpa 24 milljarða Eignir Seðla­bankans námu 977 milljörðum króna í lok mars, saman­borið við rúm­lega 1.000 milljarða króna í árs­lok 2025. Eignir bankans lækkuðu því um 23,6 milljarða króna á fyrsta árs­fjórðungi. Stærsti liðurinn í eignum bankans eru kröfur á er­lenda aðila í er­lendum gjald­eyri, sem námu 908 milljörðum króna í lok mars. Þær lækkuðu úr 933 milljörðum króna frá áramótum. Er­lend verðbréf og sjóðir námu 743 milljörðum króna í lok mars og lækkuðu úr tæpum 775 milljörðum króna í árs­lok. Lækkunin nemur tæp­lega 32 milljörðum króna á fjórðungnum. Á móti jukust er­lendar banka­innstæður úr 72,6 milljörðum króna í 80,1 milljarð króna. Sjá einnig Seðla­bankinn tapað 33 milljörðum í ár Gull­eignin tæpir 36 milljarðar Gull­eign Seðla­bankans nam 35,9 milljörðum króna í lok mars og jókst úr 34,6 milljörðum króna frá áramótum. Hún hækkaði því um rúm­lega 1,3 milljarða króna á fjórðungnum. Staða bankans við Alþjóða­gjald­eyris­sjóðinn nam 85,2 milljörðum króna í lok mars og lækkaði lítil­lega frá áramótum, þegar hún nam 86,1 milljarði króna. Gullstöng úr gullforða Seðlabankans © Aðsend mynd (AÐSEND) Eigið fé Seðla­banka Ís­lands nam 65,3 milljörðum króna í lok mars, saman­borið við 76,7 milljarða króna í lok síðasta árs. Lækkunin nemur 11,3 milljörðum króna og endur­speglar tap tíma­bilsins. Skuldir bankans námu 911,7 milljörðum króna í lok mars og lækkuðu úr 923,9 milljörðum króna frá áramótum. Skuldir við inn­lendar lána­stofnanir vegna peninga­stefnu námu 367 milljörðum króna í lok mars. Þar af námu inn­lán 116,2 milljörðum króna, bindi­skylda 112,6 milljörðum króna og bundin inn­lán 138,2 milljörðum króna. Seðlar og mynt í um­ferð námu 68,3 milljörðum króna í lok mars og höfðu lækkað lítil­lega frá áramótum. Seldu meira af verðbréfum en keyptu Í sjóð­streymi bankans kemur fram að keypt verðbréf í gjald­eyris­forða námu 115 milljörðum króna á fyrsta árs­fjórðungi. Á sama tíma seldi og inn­heimti bankinn verðbréf í gjald­eyris­forða fyrir 129 milljarða króna. Fjár­festingar­hreyfingar voru því jákvæðar um tæpa 14 milljarða króna á tíma­bilinu. Er­lendar banka­innstæður hækkuðu um 8,4 milljarða króna fyrir áhrif sjóð­streymis, en gengis­munur er­lendra banka­innstæðna var neikvæður um 889 milljónir króna. Er­lendar banka­innstæður námu 80,1 milljarði króna í lok mars.