Eigið fé Seðlabankans nam 76,7 milljörðum króna í árslok 2025 og lækkaði um 13,3 milljarða króna á síðasta ári. Til samanburðar nemur eiginfjármarkmið Seðlabankans, sem staðfest var af bankaráði í fyrra, 150 milljörðum króna. Eiginfjárhlutfall bankans lækkaði úr 9,8% í 7,7% milli ára, samkvæmt nýbirtri ársskýrslu bankans. Óhagstæðar horfur Í ársskýrslunni er bent á að bankinn hafi ekki kallað inn eigið fé frá ríkissjóði í fyrra. Lagaheimild sé þó fyrir innköllun á allt að 81,1 milljarði króna á verðlagi ársins 2025. „Niðurstöður sviðsmyndagreiningar á þróun afkomu og eigin fjár bankans til næstu þriggja ára sýna að horfur eru óhagstæðar fyrir bankann, einkum vegna horfa um aukinn vaxtamun við útlönd. Óvissa er talsverð en mat á eiginfjárþörf Seðlabankans gefur að svo stöddu ekki tilefni til að breyta eiginfjármarkmiði fyrir Seðlabankann. Það hefur því verið staðfest óbreytt af bankaráði eða 150 milljarðar króna.“ Tap Seðlabankans upp á 11,8 milljarða króna á árinu 2025 er einkum rakinn til þróunar gengismunar. Gengistap á árinu 2025 nam 5,6 milljörðum króna, sem rakið er fyrst og fremst til hækkunar á gengi krónunnar gagnvart Bandaríkjadal en hann veiktist um 9,4% gagnvart krónunni á árinu sem eitt og sér olli 23,8 milljarða króna gengistapi. Bent er á að erlendar eignir bankans námu 96% af heildareignum hans í lok árs 2025 en skuldir séu fyrst og fremst í íslenskum krónum. Því hafi hafa gengisbreytingar mikil áhrif á afkomu bankans. Í fjármálaáætlun fyrir árin 2027-2031, sem kom út í lok mars, kemur fram að ríkissjóður standi frammi fyrir áhættu vegna afkomu Seðlabanka Íslands. „Á grundvelli 40. gr. laga um Seðlabanka Íslands getur bankinn kallað eftir því að ríkissjóður leggi honum til aukið eigið fé ef það fer undir ákveðið viðmið sem stjórn bankans ákveður og afkomuhorfur hans eru þess eðlis að útlit er fyrir frekari lækkun eigin fjár. Eiginfjárframlagið getur orðið allt að 78,5 ma.kr. á núverandi verðlagi, komi til innköllunar,“ segir í fjármálaáætluninni. Ásgeir: Hefur áhrif á trúverðugleikann Ásgeir Jónsson seðlabankastjóri sagði á ársfundi bankans á árinu 2024 að þótt seðlabankar séu ekki hagnaðardrifnir og geti tæknilega séð ekki orðið gjaldþrota í heimagjaldmiðli sínum þá hafi fjárhagsstaða þeirra áhrif á trúverðugleika þeirra. „Stundum hefur verið litið á eigið fé þeirra sem eins konar fót undir verðmæti seðlaútgáfu þeirra. En í öllu falli er ljóst að taprekstur seðlabanka felur í sér raunverulega tilfærslu á verðmætum út í hagkerfið. Það er því af þessum sökum sem það er almenn alþjóðleg áhersla að seðlabankar haldi vel utan um eigið fé sitt, meðal annars til þess að tryggja trúverðugleika.“ Ásgeir sagði Seðlabankann ekki vera einan á báti þegar kemur að hallarekstri en flestir vestrænir seðlabankar búi við neikvæðan vaxtamun „sem er afleiðing af umfangsmikilli magnbundinni íhlutun eftir fjármálakreppuna 2008“. „Seðlabankar hafa á síðustu misserum gripið til ýmissa aðgerða til þess að styrkja eiginfjárstöðu sína. Þær fela m.a. í sér eiginfjárinnspýtingu frá ríkissjóði, hækkun vaxtalausrar bindiskyldu, sérstakt gjald á innlánsstofnanir og lækkun vaxtagreiðslna til ríkissjóðs.“ Sama dag tilkynnti peningastefnunefnd Seðlabankans um ákvörðun um að hækka fasta vaxtalausa bindiskyldu lánastofnana úr 2% í 3% af bindigrunni. Ársfundur Seðlabankans hefst kl. 16 á eftir. Nálgast má streymi af fundinum hér: Sjá einnig Beint: Árs­fundur Seðla­bankans