Samtök atvinnulífsins (SA) gagnrýna gullhúðun í frumvarpi atvinnuvegaráðherra, Hönnu Katrínar Friðriksson, um breytingar á lögum um ársreikninga sem varða m.a. stærðarmörk félaga. SA gera alvarlegar athugasemdir við framsetningu og forsendur þess. „Samtökin telja að fullyrðingar um samræmi við reglur Evrópusambandsins standist ekki þar sem stærðarmörk fyrirtækja í frumvarpinu eru í reynd mun þrengri en í ESB,“ segir í tilkynningu á vef SA. „Þetta leiðir til aukinnar reglubyrði og veikrar samkeppnisstöðu íslenskra fyrirtækja. Greining SA bendir til að verulegur fjöldi fyrirtækja færist milli stærðarflokka með tilheyrandi áhrifum.“ Frumvarpinu er ætlað að innleiða tvær Evróputilskipanir. Í greinargerð frumvarpsins segir að með frumvarpinu sé reynt að tryggja að flokkun félaga samkvæmt ársreikningalögum endurspegli raunverulegt efnahagslegt umfang þeirra. Sjá einnig Rýmka á veru­lega stærðar­mörk örfélaga Atvinnuvegaráðuneytið sagði í tilkynningu þegar frumvarpsdrögin voru kynnt að það væri í samræmi við stefnuyfirlýsingu ríkisstjórnar Samfylkingar, Viðreisnar og Flokks fólksins um einföldun regluverks og skilvirkt rekstrarumhverfi fyrirtækja á Íslandi. SA segir að stærðarmörkin sem kynnt eru í frumvarpinu séu ekki í samræmi við stærðarmörk Evrópusambandsins. Þau birta meðfylgjandi töflur sem sýna stærðarmörk félaga, annars samkvæmt reglum ESB, í evrum og umreiknað í krónur, og hins vegar eins og þau eru skilgreind í nýju lögunum. Samtökin vísa þannig í greinargerð frumvarpsins og segja að misræmið hafi „þau áhrif að regluverk hér á landi yrði ekki sambærilegt regluverki annarra EES-ríkja. Einnig væru stærðarviðmið íslenskra félaga lægri en í öðrum EES-ríkjum sem leiðir til þess að regluverk fyrir smærri félög yrði meira íþyngjandi hér á landi en í nágrannaríkjunum.“ SA segja íslensk fyrirtæki því þurfa að sæta talsvert ríkari kröfum en evrópsk fyrirtæki vegna gullhúðunar EES-reglna við innleiðingu í íslenskan rétt. Slíkt skerði samkeppnishæfni íslensks atvinnulífs. Tekið er dæmi um að fyrirtæki í Evrópu geti verið með 190 milljón króna meiri veltu eða 240 milljón króna meiri eignir í íslenskum krónum miðað við íslenskt fyrirtæki til að teljast örfyrirtæki. Sömuleiðis þurfi starfsmannafjöldinn að vera talsvert lægri hérlendis miðað við í Evrópu. Sérstaklega munar á eignaviðmiðum íslensku fyrirtækjanna miðað við þau evrópsku. Til að mynda geta lítil evrópsk fyrirtæki verið með 700 milljónum meiri eignir en myndu til sömu stærðar og íslensk fyrirtæki, skv. skilgreiningum ESB og frumvarpsins. „Lýsir það sér best hvað eignaviðmiðin hér á landi eru miklu þrengri en í Evrópusambandinu. Íslensk fyrirtæki geta einungis haft 17-60% þeirra eigna sem sambærileg fyrirtæki hjá Evrópusambandinu geta haft.“ SA segja ljóst er að hér sé misjafnt gefið og reglurnar séu alls ekki til samræmis við þær í Evrópusambandinu. Íslensk fyrirtæki sæti þyngri kröfum og þar með aukinni reglubyrði.