Akureyrarbær auglýsti í dag hið margumtalaða hús Bifreiðastöðvar Oddeyrar til flutnings. Húsið hefur staðið við Hofsbót í um 70 ár, en nú er komið að tímamótum en Hreyfill tók yfir rekstur BSO um mánaðamótin. Þann 1. maí afhenti BSO Akureyrarbæ húsið gegn gjaldi og mun bærinn nýta það á næstu vikum fyrir æfingar slökkviliðsins. Að æfingum loknum þarf að flytja húsið af lóðinni, eigi síðar en 15. júní, til að rýma fyrir nýjum byggingum. Áhugasömum stendur til boða að eignast húsið án endurgjalds, en allur kostnaður og ábyrgð vegna flutnings verður á hendi nýs eiganda. Þeir sem hafa áhuga á að taka við húsinu geta haft samband við Akureyrarbæ. Við val á nýjum eiganda verður meðal annars horft til fyrirhugaðrar notkunar hússins og staðsetningar þess í framtíðinni. Þiggi enginn húsið verður það rifið.