Þrír hafa verið handteknir í tengslum við stunguárás í Kristiansstad í Svíþjóð, sænska blaðið Aftonbladet greinir frá. Maður á þrítugsaldri lést af sárum sínum eftir að aðstandendur hans komu honum á bráðamóttöku með alvarlega áverka. Lögreglan segir mikið uppnám hafa orðið á bráðamóttökunni við komu mannsins, og því hafi þurft að grípa til tímabundinnar neyðarlokunar. Lögreglumenn hafi náð stjórn á aðstæðunum, ásamt öryggisvörðum spítalans. Lokunin hafi ekki haft teljandi áhrif á starfsemi bráðamóttökunnar. Þrír menn á þrítugsaldri voru handteknir í nótt. Þeir verða yfirheyrðir í dag.