Leikskólaplássum í Reykjavík fyrir næsta haust verður úthlutað 2. mars. Þá bregður svo við að ekki verður hægt að úthluta í fjóra leikskóla. Stækkun, viðgerð og flutningur koma í veg fyrir að ný börn verði tekin inn í Sæborg, Borg og Grandaborg og húsnæði Vinagerðis í Safamýri hefur verið lokað og verða börn þar flutt í aðra leikskóla. Í tilkynningu frá Reykjavíkurborg segir að 277 ný leikskólapláss verði í boði á móti þeim 169 plássum sem detta út vegna framkvæmda og viðhalds. Borgin gerir ráð fyrir að búið verði að fjölga leikskólaplássum í Reykjavík um 372 um mitt næsta ár. Það gerist með nýjum leikskóla á Fossvogsbletti og viðbótarhúsum við Vesturborg, Grandaborg, Jörfa, Maríuborg og Hólaborg.