Það var mikið um dýrðir á Höfn í Hornafirði þegar nýr Ásgrímur Halldórsson SF 250 lagðist þar að bryggju á sunnudag. Sigurður Ægir Birgisson skipstjóri sigldi skipinu ásamt áhöfn sinni frá Skagen í Danmörku þar sem fullnaðarfrágangur fór fram í Karstensens skipasmíðastöðinni. Ásgeir Gunnarsson, framkvæmdastjóri veiða, hjá Skinney-Þinganesi, segir að sparast hafi tæpir tveir milljarðar króna á smíði skipsins miðað við ef farið væri af stað í dag. Samið var um smíðina strax árið 2021. Alls kostaði það 5,5 milljarða króna. Ásgrímur Halldórsson SF er systurskip Hákons ÞH sem kom til landsins í október 2024. Skipin eru nákvæmlega eins að öllu leyti. Nýja skipsins bíður það verkefni að fara á makríl um mánaðamótin júlí-ágúst, líklega í Síldarsmuguna, en vonandi innan íslenskrar lögsögu. Fyrst verður þó tekinn prufutúr með nýja nót sem var sett upp í netaverkstæði Skinneyjar-Þinganess. Ásgeir Gunnarsson framkvæmdastjóri veiða hjá Skinney-Þinganes. Mynd/mbl „Það verður að spara aurinn og horfa í hverja krónu,“ segir Ásgeir um veiðarfæraþáttinn. „Skipið verður að veiðum með einni nót en býður þó upp á að þann möguleika að vera með nót og troll samtímis. Nýja skipið er þannig útbúið sem það eldra var ekki,“ segir Ásgeir. Fimm skip í drift – öll smíðuð fyrir Skinney-Þinganes Nýr Ásgrímur Halldórsson er ekki eins djúpristur og eldra skip með sama heiti og munar þar alveg metra. Það breytir miklu í tengslum við innsiglinguna inn í erfiðan Hornafjarðarós. Auk þess er nýja skipið umtalsvert lengra og tekur öldurnar betur en það eldra. Skinney-Þinganes er nú með fimm skip í rekstri og hefur fyrirtækið látið smíða þau öll fyrir sig. Líklega er Skinney-Þinganes eina stóra sjávarútvegsfyrirtækið sem getur státað af slíku. Síðustu tvö skipin sem fyrirtækið lét smíða fyrir sig voru Steinunn og Þinganes sem voru afhent 2020. Þau voru hluti af sjö skipa raðsmíðaverkefni sem Vard skipasmíðastöðin í Noregi vann að fyrir íslenskar útgerðir. Þórir SF var smíðaður í Tævan árið 2008 og línubáturinn Vigur var smíðaður af Víking-bátum á Íslandi 2015 fyrir Vigur ehf., dótturfélag Skinneyjar-Þinganess. Halda vel verðgildi Nýr Ásgrímur Halldórsson er fyrsta skipið sem Skinney-Þinganes fær frá Karstensens sem smíðað hefur fjölda skipa fyrir íslenskar útgerðir í gegnum tíðina. Úr brúnni í Ásgrími Halldórssyni SF. Mynd/Karstensens „Ég hitti á menn þarna úti í Danmörku sem voru að segja að skipin frá Karstensens haldi vel verðgildi sínu. Ef þau eru seld innan átta ára frá mótttöku fá menn yfirleitt meira fyrir þau en það kostaði að smíða þau," segir Ásgeir. Karstensens smíðar skip fyrir aðila út um allan heim en er með sérstaklega sterka stöðu á Norður-Atlantshafi. Markaðshlutdeild fyrirtækisins í uppsjávarskipum þar er há. Skipið kostaði þegar upp var staðið 5,5 milljarða króna. Fulltrúar Karstensens fullyrða að það myndi kosta 1,9 milljörðum króna meira að smíða sams konar skip í dag. Setustofan í nýja skipinu. Mynd/Karstensens „Við skrifuðum undir smíðasamninginn í desember 2021. Frá þeim tíma hafa öll aðföng til skipasmíðastöðva hækkað mikið. Skrifað var undir samninginn rétt fyrir Covid og svo hefst Úkraínustríðið 2022. Danirnir höfðu viðað að sér stáli og dýrustu íhlutum áður en við skrifuðum undir. Það vildi svo vel til að við vorum búnir að ganga frá þessu áður en þessi tvö áföll í heimsmálunum riðu yfir með tilheyrandi verðbólgu og verðhækkunum,“ segir Ásgeir. Mikill niðurskurður í makríl Þótt vel hafi gengið með smíði nýja skipsins og Skinney-Þinganes gert þar góðan samning eru blikur á lofti varðandi veiðar. Mikill niðurskurður er framundan í makrílkvóta sem er umtalsvert högg fyrir rekstur skipsins. Á móti kemur að Skinney-Þinganes er vel sett með kvóta í íslenskri síld, stofn sem er á uppleið, og norsk-íslenskri síld. Einnig eru bundnar miklar vonir við góða loðnuvertíð og allar mælingar benda til að svo verði. Það verði til þess að milda höggið. Eldhúsið og inn af því er borðsalurinn. Mynd/Karstensens „Síðasta ár kom mjög vel út hjá okkur. Makrílvertíðin var góð og svo fín loðnuvertíð í kjölfarið, reyndar á þessu ári. En við erum sennilega ekkert að fá makrílinn til baka. Á síðasta ári voru tekin 16 þúsund tonn í gegnum vinnsluna frá okkar skipum og Hákoni ÞH, sem landaði hjá okkur. Á þessu ári höfum við kvóta upp á 3.800 tonn í makríl. Þetta er enginn smáræðis niðurskurður.“ Ný 12.000 tonna frystigeymsla Ásgeir minnist einnig með töluverðu óyndi á samning sem utanríkisráðherra tilkynnti um í desember í fyrra við Bretland, Noreg og Færeyjar um skiptingu hlutdeildar á milli ríkjanna fjögurra í makríl. Samkomulagið gildir til ársloka 2028. Í samkomulaginu er hlutur Íslands 10,5%. Það er rúmlega þriðjungslækkun frá 16,5% hlut Íslands undanfarin ár. Spurður um hvort ráðist hefði verið í nýsmíði af þessari stærðargráðu hefðu menn séð fyrir sér þróunina í makríl, segir Ásgeir: „Við ákváðum þetta á árinu 2021 og við vitum að landslagið getur breyst. Það vofði svo sem alltaf yfir að samið yrði um makrílinn en kannski ekki með svo afgerandi hætti. Við getum samt ekki látið pólitíska óvissu stjórna okkur of mikið. Ef við gerðum það værum við sennilega ekki búnir að smíða neitt af þessum skipum.“ Á svipuðum tíma og ráðist er í stóra fjárfestingu við nýtt skip reisti Skinney-Þinganes einnig 12 þúsund tonna alsjálfvirka frystigeymslu í Höfn í samstarfi við Kælismiðjuna Frost. Síðustu tíu daga síðustu loðnuvertíðar fóru í hana 3.500 tonn af loðnu án þess að nokkrir hnökrar kæmu upp. Eldri frystigeymslan, sem tekur 4 þúsund tonn, var orðin vel pökkuð þegar farið var að keyra inn í þá nýju í lok vertíðar. Ella hefði þurft að flytja þær afurðir út í gámum eins og gert hefur verið fram að þessu. Ekki var óalgengt að fyrirtækið væri með allt að 12 þúsund tonn í geymslum víða í Evrópu með tilheyrandi kostnaði. Hvernig sem öllu er á botninn hvolft er ljóst að Skinney-Þinganes er útgerðarfyrirtæki sem hefur djörfung og framsýni til þess að fjárfesta háum upphæðum til aukinnar verðmætasköpunar til framtíðar. TÆKNILÝSING Vél: Wärtsilä 8V31, 5.200 kW Ljósavélar: Caterpillar Hliðarskrúfur: Brunvoll Fiskleitartæki: Simrad Siglinga- og fjarskiptabúnaður: JRC Aflnemar, belgstykki nóta, hleranemar og trollstaðsetning: Marport Toghlerar: Thyboron Internettengingar: Mariconnect Viðhaldskerfi: Tero Stýri og stýrisvél: Kongsberg Björgunarbúnaður: Víking Sýnatökuvog: Marel Hreinsun á olíum: Greenoil Áhugasamir spyrjast fyrir um eldra skipið Tíu manna áhöfn og sex farþegar komu með nýjum Ásgrími Halldórssyni SF til hafnar í Höfn á sunnudag. Í brúnni var Sigurður Ægir Birgisson skipstjóri sem jafnframt er stjórnarformaður Skinneyjar-Þinganess. Hann sagði að ferðin hefði sóst vel þrátt fyrir stífan norðanstrekking milli Færeyja og Íslands. Sigurður Ægir Birgisson skipstjóri og stjórnarformaður Skinneyjar-Þinganess. Mynd/Heiðar Erlingsson Sigurður Ægir er vanur í brúnni í eldra skipinu og segir mikil viðbrigði að taka við því nýja. Það er mun stærra og allt í því splunkunýtt meðan sá eldri er orðinn 25 ára gamall. Í nýja skipinu er alla nýjustu tækni að finna og vinnuaðstaða og aðstaða áhafnar allt önnur og betri. Gamli hafi þó reynst mjög vel að öllu leyti en er nú til sölu. Sigurður Ægir segir að áhugasamir aðilar hafi spurst fyrir um skipið. Þetta sé gott skip og vel við haldið. Það hafi þjónað Skinney-Þinganesi með sóma. Verða kannski ekki nema þrír makríltúrar Skipið er hannað fyrir aðstæður í Höfn og innsiglinguna þar. Þess vegna er það með minni djúpristu og reynt að hafa yfirbyggingu skipsins léttari. Þá eru bundnar miklar vonir við dýpkunarframkvæmdir fyrir utan ósinn sem eiga að hefjast í sumar. Gerður hefur verið samningur við hollenskt fyrirtæki um dýpkun til næstu þriggja ára. Innsiglingin hefur oft verið farartálmi og oft hafa skip þurft að leita annað og jafnvel lokast inni vegna aðstæðna. Innsiglingin hefur haft áhrif á veiðar stóru skipanna í Hornafirði. „Skipið reyndist vel í hvívetna á heimsiglingunni. Menn eru ennþá að læra á það en það væsti ekkert um okkur. Næsta verkefni eru makrílveiðar í júlí og ég ætla að vona að þær fari fram sem næst Íslandi. En við vitum auðvitað ekki hvar við hittum á hann. Í fyrra veiddum við mest í Smugunni en árið þar á undan mikið inni í íslensku lögsögunni. Það breytir öllu hvar við getum tekið hann þótt búið sé að semja af sér í þessum málum," segir Sigurður Ægir. Makrílkvóti skipsins er 3.800 tonn og það ber í lestum 12-13 hundruð tonn af fiski í vel kældum sjó. Tankarnir eru samtals 2.500 rúmmetrar að rúmmáli. Þetta verða því kannski ekki nema þrír túrar á væntanlegri makrílvertíð. „En svo taka bara síldveiðar við og við höfum ærið verkefni þar. Við bindum svo vonir til næstu loðnuvertíðar út frá ungloðnumælingum og virtist vera talsvert af loðnu sem gekk til hrygningar."