Nær 120 börn á höfuðborgarsvæðinu eru utan langtíma sérskólaúrræða þrátt fyrir að uppfylla skilyrði, samkvæmt skýrslu um sérskóla. Veikleikar séu í samræmingu gagna milli sveitarfélaga. Gert er ráð fyrir að stýrihópur skili tillögum um uppbyggingu nýrra sérskóla á höfuðborgarsvæðinu fyrir lok árs. 295 börn á grunnskólaaldri á höfuðborgarsvæðinu þurfa langtíma sérskólaúrræði, samkvæmt skýrslunni sem var unnin af ráðgjafafyrirtækinu HLH. Þar af eru 176 þegar í sérskóla. 136 eru í Klettaskóla, sem er fyrir nemendur með fjölfötlun og þroskahömlun og á að rúma um 90 börn. 40 eru í Arnarskóla, sem sinnir börnum með miklar og flóknar stuðningsþarfir. 119 börn, eða um 40% þessa hóps, uppfylla skilyrði en eru utan sérúrræða, oft í almennum skólum með miklum stuðningi. Gera megi ráð fyrir því að hluti þeirra haldi áfram í almennu skólakerfi en jafnframt sé ljóst að stór hluti þurfi líklega skólavist í sérskólum til lengri tíma. Rúmlega helmingur er á yngsta stigi og 36% með erlendan bakgrunn. Það er um 20% hærra en hlutfall innflytjenda af heildarfjölda grunnskólabarna á höfuðborgarsvæðinu. Þetta bendir til þess að börn af erlendum uppruna séu oftar metin í sérskólaúrræði sem sé í samræmi við þróunina í Klettaskóla. Þar hækkaði hlutfall nemenda með erlendan bakgrunn úr 6,7% í rúmlega 33% frá 2015 til 2024. Þróun synjana um skólavist í Klettaskóla sé áhyggjuefni. 41 barni hafi verið synjað um skólavist fyrir skólaárið 2025 til 2026, þrátt fyrir að uppfylla inntökuskilyrði. Synjunum fjölgaði um 32% frá árinu áður. Verulegur hópur barna sé með tímabundnar en alvarlegar þarfir sem krefjist skammtíma sérúrræða, til dæmis vegna fíkni- eða hegðunarvanda. Nær 60% með ótilgreindan vanda Áætlað er að þetta séu um sextíu til áttatíu börn. Af 68 börnum sem tilgreind eru í skýrslunni eru nærri 60% flokkuð með ótilgreindan vanda og kunna því að vera með óljósar stuðningsþarfir. Í skýrslunni segir að þetta sýni veikleika í samræmingu gagna milli sveitarfélaga og þörf á að efla samvinnu. Samtök sveitarfélaga á höfuðborgarsvæðinu undirrituðu í vikunni viljayfirlýsingu um uppbyggingu sérskólaúrræða. Gert er ráð fyrir að skila tillögum á þessu ári, en til skoðunar er hvort byggja þurfi nýjan skóla.