Kristrún Frostadóttir forsætisráðherra segir ákvörðun stjórnvalda að verja átta milljónum bandaríkjadala, um milljarði króna, í vopnakaup fyrir Úkraínu sé hluti af áður samþykktum fjárútlátum á fjárlögum. „Þetta er kostnaður sem er í takt við fjárlög og fjárveitingar síðustu ára. Þetta er í takt við skuldbindingar okkar sem NATO-þjóð,“ segir hún. „Þarna er í raun bara útdeilingin á þessu fjármagni sem var samþykkt í fjárlögunum hafin og við erum þarna að taka þátt í verkefnum sem aðrar NATO-þjóðir eru að taka þátt í.“ Þorgerður Katrín Gunnarsdóttir, utanríkisráðherra, greindi frá vopnakaupum Íslands á fimmtudag á fundi varnarmálaráðherra NATO-þjóða. Fjármagnið fer í gegnum verkefni á vegum NATO sem kallast PURL ( Prioritised Ukraine Requirements List ). Í gegnum þetta verkefni er miðað að því að uppfylla brýnar þarfir Úkraínumanna á herbúnaði og loftvörnum, með því að kaupa búnað frá Bandaríkjunum og senda til Úkraínu. Sem dæmi má nefna að Svíþjóð leggur fram 100 milljónir bandaríkjadollara eða um 12,3 milljarða íslenskra króna í verkefnið. Framlag Noregs er um 1,3 milljarðar norskra króna eða tæplega 17 milljarðar íslenskra króna. „Þetta eru verkefni sem er búið að kortleggja, skilgreina sem nauðsynleg verkefni af hálfu Úkraínumanna og við erum í rauninni bara að borga inn í þetta verkefni,“ segir Kristrún Samhljómur um að hlusta á Úkraínu Aðspurð segir hún að það sé samhljómur um framlög til Úkraínu innan ríkisstjórnarinnar. „Og það er líka samhljómur um að hlusta á Úkraínufólk, þetta er það sem það vill, það sem þau þurfa núna er aðstoð á sviði hergagna og loftrýmisgæslu, eða í rauninni yfirsýn á þessu svæði,“ segir Kristrún. „Þetta snýst um loftvarnir og að verja orkuinnviði þannig að við þurfum líka að hlusta á Úkraínufólk, hvar þarfirnar eru mestar, og við stöndum við okkar skuldbindingar gagnvart NATO í þessu skyni,“ segir hún. Kristrún segir að ekki sé farið með slíkar ákvarðanir í einu eða öllu fyrir ríkisstjórn. „Við samþykkjum heildarfjárlög þar sem fram koma skuldbindingar til ákveðinna verkefna,“ segir hún. „Það var vitað að hluti af því færi inn í varnartengd framlög og fólk er fullkomlega meðvitað um það.“