Raf­mynta­kaup­hallir keppast nú við að bjóða fjár­festum leið til að veðja á vænt hluta­bréfa­verð SpaceX áður en félagið fer á markað. Binance, Bit­get og Tra­de.xyz hafa öll hafið við­skipti með svo­kölluð tíma­laus fram­virk við­skipti, eða perpetu­al fu­tures, tengd SpaceX, sam­kvæmt Financial Times. Um er að ræða af­leiður án gjald­daga og án fasts ásetnings­verðs. Staðan „rúllar“ í reynd áfram og hagnaður eða tap fylgir verðbreytingum undir­liggjandi eignar. Í þessu til­viki er undir­liggjandi eignin þó ekki skráð hluta­bréf í SpaceX, heldur vænt verð­myndun í kringum frumút­boð félagsins. Það er því ekki verið að kaupa hlut í SpaceX. Fjár­festar fá enga eignaraðild að félaginu, engan at­kvæðis­rétt og engan rétt til af­hendingar hluta­bréfa. Þeir eru að taka af­leiðustöðu á því hvert markaðsvirði SpaceX gæti orðið. 20-föld gírun í boði hjá Binance Áhættan er veru­leg en Binance býður allt að 20-falda skuld­setningu í SpaceX-samningunum, sam­kvæmt FT. Slík gíruð við­skipti geta marg­faldað hagnað en einnig þurrkað út eigið fé fjár­festis á skömmum tíma. Dæmið er ein­falt: Fjár­festir sem leggur fram 500 dali með tífaldri skuld­setningu stýrir 5.000 dala stöðu. Ef undir­liggjandi eign hækkar um 10% tvöfaldast eigið fram­lag. Ef hún lækkar um 10% getur eigið féð hins vegar þurrkast út. Í tíma­lausum fram­virkum samningum er jafn­framt oft inn­byggt gjald sem er reiknað reglu­lega, gjarnan nokkrum sinnum á dag. Mark­miðið er að halda verði samningsins nálægt verði undir­liggjandi eignar. Ef verð samningsins er hærra en viðmiðunar­verðið greiða þeir sem eru í hækkunar­stöðu gjald til þeirra sem eru í lækkunar­stöðu. Ef samningurinn er lægra verðlagður getur greiðslu­flæðið snúist við. Gjaldið getur því étið veru­lega inn í ávöxtun, sér­stak­lega ef fjár­festir heldur stöðunni lengi. Verð­leggja SpaceX á 2.500 milljarða dala Tra­de.xyz hóf við­skipti með SpaceX-samningana á mánu­dag á 150 dali. Það verð byggði á áætluðu markaðsvirði upp á 1.780 milljarða dala og 11,87 milljarða hluta. Á fimmtu­dag voru samningarnir komnir í um 210 dali. Það jafn­gildir verðmati á SpaceX upp á um 2.500 milljarða dala. Sam­bæri­legur samningur hjá Binance var einnig í kringum 210 dali og hafði farið hæst í 225 dali síðasta sólar­hringinn, sam­kvæmt FT. Til saman­burðar hefur Financial Times áður greint frá því að SpaceX hafi rætt um að afla um 75 milljarða dala í hluta­fjárút­boði á verðmati sem gæti numið 1.750 milljörðum dala. Stærsta frumút­boð sögunnar í kortunum Áhugi raf­mynta­kaup­hallanna endur­speglar væntingar um að frumút­boð SpaceX geti orðið eitt það stærsta í sögunni. SpaceX er ekki lengur aðeins eld­flauga­fyrir­tæki. Starf­semin spannar geims­kot, gervi­hnetti, Star­link-netið og vaxandi tengingu við gervi­greindarinn­viði. Félagið er eitt stærsta og verðmætasta einka­fyrir­tæki heims og ná­tengt við­skipta­veldi Elon Musk. Fyrir raf­mynta­kaup­hallirnar er tækifærið aug­ljóst. Þær geta boðið við­skipta­vinum að taka stöðu í einu um­talaðasta óskráða félagi heims áður en hefðbundnir smáfjár­festar fá að­gang að hluta­bréfunum. En fyrir fjár­festa er mikilvægt að átta sig á að þetta er ekki leið til að kaupa SpaceX fyrir skráningu. Þetta er leið til að veðja á væntingar um SpaceX. Af­leiðu­markaður sem hefur sprungið út Tíma­laus fram­virk við­skipti hafa verið eitt heitasta fyrir­bærið á raf­mynta­mörkuðum síðustu ár. Þau voru lengi fyrst og fremst notuð til að taka stöðu á Bitcoin og öðrum raf­myntum, en hafa nú færst yfir á fleiri eigna­flokka. Raf­mynta­kaup­hallir og miðlarar hafa á síðustu misserum boðið slíka samninga tengda olíu, gulli og hluta­bréfum á borð við Nvidia og Tesla. Nú bætist SpaceX við, áður en félagið er einu sinni komið á markað. Sjá einnig Nýjasta æðið hjá áhættusæknum fjár­festum Sam­kvæmt Coin­Gecko námu við­skipti með tíma­lausa fram­virka samninga í miðlægum raf­mynta­kaup­höllum 85.300 milljörðum dala árið 2025. Þróunin sýnir hvernig mörkin milli raf­mynta­markaða og hefðbundinna fjár­mála­markaða verða sí­fellt óskýrari. Raf­mynta­kaup­hallir eru ekki lengur aðeins að bjóða við­skipti með Bitcoin og aðrar raf­myntir, heldur af­leiður tengdar hrávörum, hluta­bréfum og væntum frumút­boðum. Áhættusæknin færist upp um gír Við­skipta­blaðið fjallaði nýverið um að tíma­laus fram­virk við­skipti væru orðin eitt nýjasta æðið hjá áhættusæknum fjár­festum. Þar var bent á að slík við­skipti geti veitt fjár­festum 10-, 20- og jafn­vel 100-falda stöðu með skuld­setningu, en að áhættan sé í samræmi við það. Veðköll, þvinguð lokun á stöðu og reglu­leg fjár­mögnunar­gjöld geta fljótt breytt hagnaði í tap. SpaceX-samningarnir eru enn áhættu­meiri en hefðbundin tíma­laus fram­virk við­skipti með skráðar eignir. Í stað hluta­bréfs með sýni­legt markaðsverð er verið að verð­leggja væntingar um óskráð félag, væntan­legt frumút­boð og endan­legt verðmat sem liggur ekki fyrir. Þetta er því ekki aðeins veðmál á SpaceX. Þetta er veðmál á að markaðurinn hafi rétt fyrir sér um eitt stærsta og um­talaðasta frumút­boð sögunnar.