Bruno Rodriguez Parrilla utanríkisráðherra Kúbu hefur biðlað til heimsbyggðarinnar um liðsinni svo koma megi í veg fyrir að frekari hörmungar skelli á landinu. Kúba hefur mátt þola hafnbann Bandaríkjanna á olíu frá Venesúela mánuðum saman, sem skapað hefur djúpa orkukreppu ofan á bágt efnahagsástand sem varað hefur um árabil vegna viðskiptaþvingana. Matvæla- og lyfjaskortur er landlægur og raforkukerfið er komið að fótum fram . Rodriguez Parrilla ávarpaði öryggisráð Sameinuðu þjóðanna í gær og sagði tíma til kominn að alþjóðasamfélagið standi með Kúbu. „Ég hvet alþjóðasamfélagið til að sameinast svo koma megi í veg fyrir mannúðarvoða af völdum hafnbanns eða vopnaskaks,“ sagði Rodriguez. Donald Trump Bandaríkjaforseti hefur iðulega gefið í skyn að hernaðarárás verði gerð á Kúbu og utanríkisráðherrann Marco Rubio sagði í liðinni viku að Bandaríkjamenn væru harðákveðnir í að fella kommúnistastjórnina í landinu. Það var eftir að bandarísk yfirvöld ákærðu Raúl Castro , fyrrverandi Kúbuforseta, fyrir morð, samsæri um morð og eyðileggingu flugvéla. Ákæruna sagði Rodriguez vera af pólitískum ástæðum og að fáránlegt væri að fullyrða að Bandaríkjunum stafaði nokkur hætta af Kúbu.