Paramount Skydance, Netflix, Warner Bros., Sony, Disney. Þetta eru ekki aðeins stærstu kvikmyndaframleiðslufyrirtæki í heiminum heldur eiga þau öll það sameiginlegt að hafa fordæmt nýtt gervigreindarlíkan ByteDance, kínversks eiganda TikTok. Gervigreindarlíkanið Seedance 2.0 var gefið út fyrr í mánuðinum en spunagreindin er notuð til að búa til myndbönd. Skömmu eftir útgáfuna fór að birtast mikill fjöldi myndskeiða sem unnin eru með forritinu og brjóta á höfundarrétti. Þetta er efni á borð við heimatilbúnar senur í Hringadróttinssögu Peters Jacksons og myndskeið af Tom Cruise og Brad Pitt í slag. Variety hefur fylgst með þróun málsins. Hagsmunasamtök kvikmyndaveranna, Motion Picture Association (MPA), riðu á vaðið 12. febrúar og fóru fram á að ByteDance hætti að brjóta á höfundarrétti. Amazon MGM, Netflix, Paramount, Sony, Universal, Disney og Warner Bros. eru öll meðlimir í samtökunum. Nú hafa sjö af átta meðlimum MPA sent kröfubréf til ByteDance og krafist þess að fyrirtækið stöðvi höfundarréttarbrot sín án tafar. Ógna lífsviðurværi leikara SAG-AFTRA, stéttarfélag leikara í Bandaríkjunum, var meðal þeirra fyrstu til að fordæma notkun gervigreindarlíkansins. Það vill svo til að Sean Astin, sem vakti mikla lukku í hlutverki Sóma Gambans í Hringadróttinssögu, fer fyrir stéttarfélaginu í dag. Astin hefur einmitt verið látinn fara með hlutverk Sóma á ný, ef svo má segja, í myndböndum sem framleidd eru með Seedance. „SAG-AFTRA stendur með kvikmyndaverunum í að fordæma blygðunarlaus höfundarréttarbrot sem ný spunagreind ByteDance, Seedance 2.0, gefur notendum kost á að fremja,“ segir í yfirlýsingu frá stéttarfélaginu. „Brotin felast meðal annars í ósamþykktri notkun á röddum og útlitseinkennum félagsmanna okkar. Þetta er óásættanlegt og dregur úr möguleikum listafólks á að lifa af starfi sínu. Seedance 2.0 virðir ekki lög, siðferði, viðmið iðnaðarins eða almennar reglur um samþykki. Ábyrg gervigreindarþróun krefst ábyrgðar – og hún er ekki til í þessu tilfelli.“ Hagsmunasamtök kvikmyndaveranna sendu kröfubréf til ByteDance í gær. Samtökin fara fram á að fyrirtækið hætti að þjálfa Seedance 2.0 með höfundarréttarvörðu efni úr kvikmyndum og sjónvarpsþáttaröðum. Þá fara samtökin fram á að ByteDance innleiði varnir við því að spunagreindin sé notuð til að framleiða efni sem brýtur gegn höfundarrétti. ByteDance segir í svari við kröfubréfi samtakanna að fyrirtækið virði höfundarréttarlög og muni taka viðeigandi skref til að bæta varnir gegn höfundarréttarbrotum. Lögfræðingar MPA gefa lítið fyrir svarið og segja að kvikmyndaiðnaðurinn þurfi á meiru að halda en almennum yfirlýsingum.