Laxeldisleyfi í Mjóafirði verða að líkindum boðin út áður en langt um líður. Fyrst þarf Hafrannsóknastofnun þó að ljúka við mat á burðarþoli. Þeirri vinnu miðar vel, segir verkefnastjóri, enda lágu öll helstu gögn fyrir. Hingað til hefur reglan fyrstur kemur fyrstu fær gilt um leyfi til sjókvíaeldis en með lagabreytingu fyrir nokkrum árum var opnað á útboð eldisleyfa. Eldi í Mjóafirði verður að líkindum boðið út á næstu mánuðum þegar Hafrannsóknastofnun hefur lokið við að meta burðarþol fjarðarins og möguleg eldissvæði. Tímafrekustu og dýrustu rannsóknirnar voru gerðar á árum áður þegar mældir voru hafstraumar, selta, súrefni og fleira. Rakel Guðmundsdóttir, líffræðingur hjá Hafró, stýrir rannsóknunum og segir að nú sé verið að keyra ýmis líkön sem herma eftir aðstæðum í Mjóafirði. „Þetta eru svona fínskalalíkön sem spá fyrir meðal annars um strauma innan fjarðar og hvernig afdrif úrgangs verða frá eldinu. Það hjálpar okkur líka til við að meta staðsetningu eldisins,“ segir Rakel. Svæði utar í firðinum henta líklega betur Enn er ekki komið á hreint hvaða staðir henta best en byrjað er að kanna athafnasvæði í strandsvæðaskipulagi. Mjóifjörður ber nafn með rentu og því eru takmarkaðir straumar innst í firðinum. „Það er búið að skipta Mjóafirði upp í tvö vatnshlot. Það er vegna þess að innst í firðinum eru straumar veikari en utar. Það er munur á Mjóafirði-ytri og Mjóafirði-innri,“ segir Rakel. Mjófirðingar vilja laxeldi og Kaldvík hefur lýst yfir áhuga á að bjóða í væntanleg eldissvæði í Mjóafirði. Eldisfyrirtæki hafa ekki getað fullnýtt heildarleyfi en fleiri eldissvæði auðvelda tilhögun eldisins og hvíld eldissvæða bitnar síður á framleiðslunni. Rakel segir að mörgu að hyggja við útgáfu burðarþolsins sem ráðherra bað um að yrði tilbúið í vor. „Markmiðið okkar er að þetta sé gert í sátt við vistkerfi og náttúru fjarðanna. Þannig að það sé um að ræða sjálfbæran iðnað,“ segir Rakel Guðmundsdóttir, líffræðingur og verkefnastjóri burðarþolsmats hjá Hafrannsóknastofnun.