Íransstjórn heldur áfram að hóta grimmilegum viðbrögðum láti Bandaríkin til skarar skríða með atlögu að landinu og ítrekaði að allt færi þá í bál og brand í Mið-Austurlöndum. Leiðtogar ríkjanna hafa haft í hótunum á víxl á sama tíma og bæði undirbúa óbeinar viðræður um kjarnorkuvopnasamning í Genf á föstudag. Íranar hafa sagst geta lagt fram drög að áætlun á næstu dögum en Donald Trump Bandaríkjaforseti sagði á fimmtudag þá hafa fimmtán daga til að skila þeim. Íranar segja áætlun sína snúast um borgaralega notkun kjarnorku en ríki á Vesturlöndum óttast að þeir hyggist smíða kjarnorkusprengju. Bandaríkjamenn vilja því einnig ræða þær grunsemdir og stuðning Írana við vígasveitir í heimshlutanum. Á sama tíma hefja háskólastúdentar misserið með mótmælum gegn klerkastjórninni með svipuðum slagorðum og mótmælendur sem mættu hörðum og blóðugum viðbrögðum stjórnvalda í janúar. Annarri umferð samningaviðræðna með milligöngu Ómana lauk í Sviss í síðustu viku.